Qazaqstannyń kanadalyq ýran kompanııasynyń aldynda eshqandaı mindettemesi joq – Ádilet mınıstrligi
ASTANA. KAZINFORM – Qazaqstannyń kanadalyq «World Wide Minerals» ýran kompanııasynyń aldynda eshqandaı mindettemesi joq. Bul týraly Ortalyq kommýnıkatsııalar qyzmetindegi brıfıngte Ádilet mınıstrliginiń resmı ókili Talǵat Ýálı aıtty.

- 2025 jylǵy 28 Aqpanda «World Wide Minerals» kanadalyq ýran kompanııasynyń Qazaqstan Respýblıkasyna qarsy talap qoıýy boıynsha 2013 jyldan beri jalǵasyp kele jatqan daý nátıjesinde Londonnyń Joǵarǵy Soty Qazaqstan Respýblıkasy úshin oń sheshim shyǵardy. Ol boıynsha respýblıka talap ıelerine shamamen 65 mln AQSh dollaryn tóleýge tıis bolatyn 2024 jylǵy qabyldanǵan sheshimniń kúshi joıyldy, - dedi Talǵat Ýálı.
Onyń atap ótýinshe, WWM talaptary QR Úkimetiniń 1997 jyly ýran eksportyna lıtsenzııa berýden bas tartýyna jáne Tyń taý-ken hımııa kombınatyn (Qazirgi Stepnogorsk taý-hımııa kombınaty) senimgerlik basqarý kelisimshartyn buzýyna negizdeldi.
- 2025 jylǵy sheshimge sáıkes Qazaqstan Respýblıkasynyń WWM aldynda eshqandaı mindettemesi joq. Aıta ketý kerek, aǵylshyn sotynda shaǵymdaný standarttary óte joǵary jáne osy negizdegi daýlardyń 2 paıyzdan azy ǵana qaıta qaralyp keri sheshim shyǵarylady. Osylaısha, Ádilet mınıstrliginiń, memlekettik organdardyń jáne Úkimet konsýltantynyń úılesimdi jumysynyń arqasynda eleýli bıýdjet qarajatyn únemdeýge, sondaı-aq eldegi ınvestıtsııalyq ahýaldyń tartymdylyǵyn jáne Qazaqstan Respýblıkasynyń halyqaralyq arenadaǵy ımıdjin saqtaýǵa múmkindik týdy, - dedi ol.
2020 jyly 23 qarashada Anglııanyń Joǵary soty Qazaqstan Respýblıkasyna qarsy «World Wide Minerals» kanadalyq kompanııanyń jáne Pol A.Kerolldyń talaby boıynsha osydan buryn shyǵarylǵan tórelik sheshimniń (sonyń ishinde zalal, paıyzdar jáne somalar boıynsha mánine qatysty) kúshin joıǵan edi.