Qazaqstannyń IT-qyzmetteriniń eksporty 881 mln dollarǵa jetti
ASTANA. KAZINFORM – Qazaqstan Dýbaıda ótip jatqan GITEX GLOBAL 2025 iri álemdik tehnologııalyq kórmesine tsıfrlyq sheshimderi men startaptardyń basyn biriktirgen ulttyq pavılonyn usyndy.
Bastamany QR Saýda jáne ıntegratsııa mınıstrligi QazTrade-men birlesip júzege asyrýda. Pavılonda jasandy ıntellekt salasyndaǵy ázirlemelerdi kórsetetin 20 kompanııa bar.
Qatysýshylar arasynda jasandy ıntellektti qoldana ınsýltti anyqtaý úshin dárigerlerge kómektesetin Cerebra.ai jáne úshin, ónerkásip qaýipsizdigi salasynda beıne-analıtıka júıesin damytýǵa baǵyttalǵan BEST vision Technologie, qazaqstandyq bilim berý servısterin ilgeriletetin BilimApp, aeroǵaryshtyq tehnologııalarmen jumys isteıtin Ghalam jáne erekshe qajettilikteri bar adamdar úshin tsıfrlyq sheshimder jasaıtyn Alaqan jobalary bar. Bul kompanııalardyń barlyǵy álemdik naryqqa shyǵýǵa yqpal etetin QazTrade «Eksporttyq akseleratsııa» baǵdarlamasyna qatysýshylar.
Qazaqstandyq IT-komandalar BAÁ, Saýd Arabııasy jáne Katardan kelgen ınvestorlarmen jáne tehnologııalyq kompanııalarmen kezdesýler ótkizip jatyr. Memlekettik servıster men korporatıvtik platformalarǵa otandyq sheshimderdi engizý talqylanýda.
Kórme aıasynda qazaqstandyq TrustMe kompanııasy Dýbaıdaǵy Sogdians Venture Studio kompanııasymen kelisimge qol qoıdy. Olar qazir BAÁ men Taıaý Shyǵys pen Soltústik Afrıka (MENA) naryǵyndaǵy TrustMe resmı ókilderi bolyp tabylady.
Sonymen qatar, Blackstone AI kompanııasy Family Eight Holdings Limited (BAÁ) kompanııasymen Memorandýmǵa qol qoıdy. Taraptar jasandy ıntellekt tehnologııalaryn ıntegratsııalaý, jańa ónimderdi birlesip ázirleý jáne sheteldik naryqqa shyǵýdy keńeıtý salasyndaǵy yntymaqtastyq týraly ýaǵdalasty.
«GITEX memlekettik delegatsııalar men tehnologııalyq korporatsııalardy qosa alǵanda, 170-ten astam eldiń qatysýshylaryn biriktiredi. Kórmege qatysý qazaqstandyq IT-kompanııalardy halyqaralyq naryqtarǵa ilgeriletý úshin strategııalyq qadam bolyp otyr. Qazaqstan shıkizatty ǵana emes, zııatkerlik ónimderdi de eksporttaıtyn el retindegi ornyn nyǵaıtýda. 2024 jyly Qazaqstannyń IT-qyzmetteriniń eksporty 20,3% — ǵa ulǵaıyp, 881 mln dollarǵa jetti», — dep atap ótti Qaztrade basqarýshy dırektory Aınur Ámirbekova.
Qazaqstannyń GITEX-ke qatysýy memleket Basshysynyń 2025 jylǵy Joldaýynda belgilengen basymdyqtardy kórsetedi, onda ol «jasandy ıntellekt pen tsıfrlyq tehnologııalar eldiń ekonomıkalyq ósýi men jahandyq básekege qabilettiliginiń jańa draıveri bolýǵa tıis» dep atap ótti.
Aıta keteıik, Astana Hub rezıdentteri 90-nan astam elge IT-qyzmet eksporttaǵan.