Qazaqstannyń IT-qyzmetter eksporty qanshalyqty artady
ASTANA. KAZINFORM – 2029 jylǵa qaraı IT-eksportty keminde 2 mlrd AQSh dollaryna jetkizý josparlanǵan. Bul týraly búgin Úkimet otyrysynda QR Premer-mınıstriniń orynbasary – Jasandy ıntellekt jáne tsıfrlyq damý mınıstri Jaslan Mádıev málim etti.
- Básekege qabiletti ulttyq IT-ekojúıeni damytýǵa toqtalsaq, Astana Hub 2 500-den astam rezıdentti biriktirip otyr. 2025 jyldyń qorytyndysy boıynsha Qazaqstannyń IT-qyzmetter eksporty 1,1 mlrd AQSh dollarynan asty. Alem Ventures arqyly kólemi 115 mln dollar bolatyn venchýrlyq qorlar quryldy. Elimizde myqty tehnologııalyq kompanııalar qalyptasyp, básekege qabiletti IT-ónimder jasaldy. Injenerler men zertteýshilerdi daıarlaý úshin Qazaq AI Research University ashyldy. Bul – Ortalyq Azııadaǵy alǵashqy AI-Enabled ýnıversıtet. Network School iske qosyldy. Onda otandyq jáne sheteldik IT-ınjenerler jahandyq naryqqa IT-qyzmetterdi eksporttaýǵa daıyndalady, - dedi J.Mádıev.
Onyń aıtýynsha, Trusted Kazakhstan arqyly daryndy mamandar men ınvestorlardy tartý jalǵasyp jatyr. Digital Nomad Visa / Residency baǵdarlamasyna 80 elden 1 900-den astam ótinim tústi. Strategııalyq ınvestorlarǵa arnalǵan Altyn Visa iske qosylyp jatyr.
- Astana men óńirlerde IT-habtardyń ınfraqurylymy keńeıtilip keledi. Halyqaralyq habtar jelisi AQSh, Qytaı, Malaızııa jáne Birikken Arab Ámirlikterin qamtıdy. Ulybrıtanııada Eurasian Hub ashý jumystary júrgizilip jatyr. 2029 jylǵa qaraı IT-eksportty keminde 2 mıllıard AQSh dollaryna jetkizý jáne keminde úsh unicorn-kompanııa qalyptastyrý josparlanǵan, - dedi Premer-mınıstrdiń orynbasary.
Buǵan deıin habarlanǵandaı, qalalyq servısterdi basqarý boıynsha Astana tájirıbesi el óńirlerinde engiziledi.
