Qazaqstannyń IT-qyzmetter eksporty bes jylda shamamen 34 ese ósti
ASTANA. KAZINFORM — Keıingi bes jylda Qazaqstannyń IT-qyzmetter eksporty 2020 jylǵy 33,5 mln AQSh dollarynan 2025 jyldyń qorytyndysy boıynsha 1,142 mlrd AQSh dollaryna deıin ósti.
Jasandy ıntellekt jáne tsıfrlyq damý mınıstrliginiń málimetine qaraǵanda, IT-qyzmetter eksporty osy kezeń boıy turaqty ósim kórsetti. 2021 jyly eksport kólemi 60,07 mln AQSh dollaryn, 2022 jyly 337 mln AQSh dollaryn, 2023 jyly 529,1 mln AQSh dollaryn, 2024 jyly 690,7 mln AQSh dollaryn qurady. Al 2025 jyly bul kórsetkish alǵash ret 1 mlrd AQSh dollarynan asty.
Sonymen qatar Qazaqstan IT-qyzmetterdiń netto-eksporttaýshysy deńgeıine shyqty. Eksporttan túsken tabys sheteldik tsıfrlyq sheshimderdi ımporttaýǵa jumsalǵan 429 mln AQSh dollarynan 2,6 eseden astam joǵary boldy.
— Osy kórsetkishterdiń aıasynda Qazaqstan óńirdegi tehnologııalyq eksporttaýshylar arasyndaǵy pozıtsııasyn nyǵaıtyp keledi. Salystyrý úshin, Grýzııanyń telekommýnıkatsııalyq, kompıýterlik jáne aqparattyq qyzmetter eksporty 2024 jyly 842,3 mln AQSh dollaryn, al Armenııada shamamen 1,18 mlrd AQSh dollaryn qurady. Eksport kóleminiń ósýi qazaqstandyq IT-kompanııalardyń halyqaralyq naryqtardaǵy qatysý geografııasynyń keńeıýimen qatar júrip jatyr. Búginde otandyq tsıfrlyq sheshimder álemniń 110-nan astam eline eksporttalady. Astana Hub qatysýshylarynyń eksporty 2025 jyly 634 mln AQSh dollaryna jetti, 537 kompanııa sheteldik naryqtarǵa ónimderin shyǵaryp otyr, al ekojúıede 32 myńnan astam jumys orny quryldy, — delingen habarlamada.
Kelesi kezeń qazaqstandyq tehnologııalyq kompanııalardy aýqymdy túrde damytý jáne olardyń iri halyqaralyq naryqtarǵa shyǵýyna baǵyttalady. Basym baǵyt retinde AQSh, Eýropa, Taıaý Shyǵys jáne Azııa naryqtary, sondaı-aq otandyq IT-sheshimderdi halyqaralyq deńgeıde ilgeriletý arnalary qarastyrylyp otyr. Strategııalyq maqsat Qazaqstannyń IT-qyzmetter eksportyn 2030 jylǵa qaraı 5 mlrd AQSh dollaryna deıin jetkizý.
Qazaqstandaǵy ósimniń basty ereksheligi tek aýqymynda ǵana emes, onyń qarqynynda da. Osydan bes jyl buryn elimizdiń IT-qyzmetter eksporty ondaǵan mıllıon AQSh dollarymen ólshense, búginde 1 mlrd AQSh dollarynan asty. Qazaqstan is júzinde qalyptasyp kele jatqan IT-naryqtar sanatynan óńirlik tehnologııalyq eksporttaýshylar qataryna ótti.
Eske salaıyq, buǵan deıin qazaqstandyqtarǵa IT meńgerýge 500 myń teńgege deıin vaýcher beriletinin jazǵanbyz.
