Qazaqstannyń Iranǵa agroónerkásip ónimderi eksporty 97 paıyzǵa ósti
ASTANA. KAZINFORM – Qazaqstan men Iran arasyndaǵy agroónerkásiptik keshen salasyndaǵy yntymaqtastyq qarqyndy damyp keledi. Ótken jyly Qazaqstannyń Iranǵa aýyl sharýashylyǵy ónimderiniń eksporty 97 paıyzǵa artyp, 238,5 mln AQSh dollaryna jetti.
Bul másele Aýyl sharýashylyǵy mınıstri Aıdarbek Saparov pen Iran Islam Respýblıkasynyń Ónerkásip, ken óndirý jáne saýda mınıstri Seıed Mohammad Atabak arasyndaǵy kezdesýde talqylandy.
Taraptar agroónerkásiptik keshendegi áriptestikti keńeıtý, ózara saýda kólemin ulǵaıtý jáne ınvestıtsııalyq baılanystardy nyǵaıtý máselelerine nazar aýdardy.
– Qazaqstan Iranmen agrarlyq saladaǵy yntymaqtastyqty tereńdetýge erekshe mán beredi. Bizdiń ónimderimiz birin-biri tolyqtyryp otyrady, oǵan jyl saıynǵy turaqty ósim naqty dálel, – dedi Aıdarbek Saparov.
Mınıstrliktiń málimetinshe, 2025 jyldyń qorytyndysy boıynsha eki el arasyndaǵy agroónerkásip salasyndaǵy taýar aınalymy 55,8 paıyzǵa ósip, 342 mln AQSh dollaryn qurady. Bul ekijaqty saýdanyń jalpy kóleminiń 79 paıyzyna teń.
Qazaqstandyq astyq eksporty da aıtarlyqtaı ósken.
– Astyq jetkizý kólemi eki eseden astam artyp, 1,1 mln tonnaǵa jetti. Onyń quny 225,3 mln AQSh dollaryn qurady, – delingen habarlamada.
Kezdesý barysynda Iranǵa astyq eksportyn odan ári ulǵaıtý, sondaı-aq halyqaralyq veterınarııalyq jáne halal talaptarǵa saı sıyr jáne qoı etin jetkizý máseleleri talqylandy.
Sonymen qatar ósimdik maılary men ózge de azyq-túlik ónimderin Iran naryǵyna shyǵarý áleýeti joǵary ekeni atap ótildi.
Óz kezeginde Seıed Mohammad Atabak Irannyń Qazaqstanmen saýda-ekonomıkalyq yntymaqtastyqty keńeıtýge múddeli ekenin aıtty.
– Qazaqstan – Irannyń óńirdegi mańyzdy seriktesteriniń biri. Biz ózara taýar aınalymyn arttyrýǵa, aýyl sharýashylyǵy ónimderiniń tasymalyn keńeıtýge, logıstıkalyq baǵyttardy damytýǵa jáne agroónerkásiptik kooperatsııa jobalaryn júzege asyrýǵa qyzyǵýshylyq tanytamyz, – dedi ırandyq mınıstr.
Kezdesýde ınvestıtsııalyq yntymaqtastyq máseleleri de kóterildi.
Aıdarbek Saparov ırandyq ınvestorlardy Qazaqstandaǵy aýyl sharýashylyǵy ónimderin óndirý jáne tereń óńdeý jobalaryna, ásirese astyq pen maıly daqyldardy óńdeý salasyna qatysýǵa shaqyrdy.
Kezdesý qorytyndysynda taraptar agroónerkásiptik keshenniń barlyq negizgi baǵyttary boıynsha yntymaqtastyqty odan ári damytýǵa daıyn ekenderin málimdedi.
Aıta keteıik, Qazaqstan men Mońǵolııa agrarlyq ǵylym salasynda yntymaqtastyqty kúsheıtedi.
