Qazaqstannyń ınnovatsııalyq ónimderi halyqaralyq kórmede tanystyryldy
ASTANA. KAZINFORM — Qazaqstandyq 20 kompanııa «INNOPROM. Belarýs» halyqaralyq kórmesinde ınnovatsııalyq ónimderin tanystyryp, otandyq óndiristiń eksporttyq áleýetin kórsetti. Bul týraly Úkimet málim etti.
EAEO-ǵa qatysýshy elder men baqylaýshy memleketter delegatsııalarynyń basshylary «INNOPROM. Belarýs» kórmesine baryp, ekspozıtsııalarmen, sonyń ishinde Qazaqstanda óndiriletin ınnovatsııalyq ónimdermen tanysty.
Qazaqstan 40-qa jýyq eldiń ókilderiniń basyn biriktirgen «INNOPROM. Belarýs» halyqaralyq ónerkásiptik kórmesine qatysýda. Ulttyq ekspozıtsııamyzǵa mashına jasaý, tsıfrlandyrý, taý-ken metallýrgııa jáne hımııa, jeńil ónerkásip salalarynan shyqqan 20 kompanııa ónimderin shyǵardy. Bıyl Qazaqstan joǵary eksporttyq áleýeti bar jańa ónerkásiptik ázirlemelerdi usynyp otyr, dep habarlady ónerkásip jáne qurylys vıtse-mınıstri Oljas Saparbekov.
— Árbir joba ózinshe biregeı. Temirjol salasyna arnalǵan ónimderdiń ishinde Qazaqstanda óndiriletin dóńgelekter jubyn atap ótýge bolady. Sonymen qatar, bizdiń kásiporyndar vagon jasaýda qoldanylatyn temirjol dóńgeleginiń jańa S-tárizdi dıskisin jasap shyǵardy. Onyń qyzmet etý merzimi 1520 mm-lik joltabandary úshin paıdalanylatyn analogtaryna qaraǵanda uzaǵyraq. Mundaı ázirlemeler bizdiń kásiporyndarymyzdyń ınnovatsııalyq jáne básekege qabiletti ónim jasaýǵa qabiletti ekenin kórsetedi, — dep atap ótti Oljas Saparbekov.
Otandyq teledıdar óndirýshisi Ortalyq Azııa elderine eksport kólemin arttyrýdy josparlap otyr
Qazaqstanda óndiriletin teledıdarlardyń jartysyna jýyǵyn bir kásiporyn shyǵarady. Bes jyl ishinde DS Multimedia CA kompanııasy jalpy quny shamamen 10 mlrd teńgeni quraıtyn 250 myńnan astam teledıdar óndirdi.
Sońǵy bir jylda zaýyttyń táýligine shyǵaratyn óndiris kólemi eki esege – 600-700-den 1200-1300 teledıdarǵa deıin artty. Sondaı-aq artqy panelder, qaptama men quramdas bólshekter óndirisi jolǵa qoıyldy.
Qazirgi tańda kompanııa ónimderi Reseıge eksporttalýda. Aldaǵy ýaqytta kásiporyn ónim túrlerin keńeıtýdi kózdep otyr, Ózbekstan, Qyrǵyzstan jáne basqa da elderdiń naryqtaryna shyǵý máselesin qarastyrýda.
Kompanııa kórmege qatysý jańa seriktester taýyp, eksport geografııasyn keńeıtýge múmkindik retinde qarastyrady.
Qazaqstandyq turmystyq tehnıka óndirýshisi bir jylda óndiris kólemin eki esege arttyrdy
Turmystyq tehnıka shyǵaratyn qazaqstandyq Almaty Turmystyq Tehnika Zavody 2028 jyly tońazytqyshtar men muzdatqysh jabdyqtar óndirisin jolǵa qoıýdy josparlap otyr. Qazirgi tańda zaýyt as úı plıtalaryn, peshter men as pisirý panelderi jáne aýa sorǵyshtar qurylǵylar shyǵarady.
Kompanııa óndiris kólemin jyl saıyn arttyryp keledi. 2024 jyly 30 myń dana tehnıka óndirilse, 2025 jyly bul kórsetkish 55 myńǵa jetti. 2026 jyldyń qorytyndysy boıynsha óndiris kólemin 100-110 myń danaǵa jetkizý josparlanyp otyr.
— Kásiporynda shtamptaý, boıaý jáne emaldaý tsehtary, sondaı-aq qaptamalarǵa arnalǵan penoplast óndirý jelisi bar. Metall bólshekterdi kásiporynymyzdyń ózinde ázirlengen matrıtsalar men press-formalardy paıdalana otyryp, ózimiz óndiremiz. Kompanııa ónimniń dızaınyn da ózi ázirlep, óndiristi barynsha lokalızatsııalady. Kelesi kezeń – klımattyq tehnıka, tońazytqyshtar men muzdatqysh jabdyqtar óndirisin ıgerý. Atalǵan jobany 2028 jyly bastap, ónim shyǵarý isin jolǵa qoıýdy josparlap otyrmyz, — dedi kásiporyn basshysy Arsen Ýshtaev.
Qazaqstandyq kompanııa asa agressıvti ortada jumys isteýge arnalǵan ónerkásiptik sorǵy ázirledi
«Maker» JShS kompanııasy ózderi jasap shyǵarǵan OSS-180 kóldeneń ornatylatyn ortadan tepkish sorǵyny kópshilik nazaryna usyndy, ol úlken kólemdegi sýdy sorýǵa jáne kenishterdegi eńbek jaǵdaılaryn turaqtandyrýǵa múmkindik beredi. Kásiporyn ónerkásiptik sorǵylar óndirisin keńeıtýdi jáne shetelge shyǵara bastaýdy josparlap otyr.
— Qurylǵy saǵatyna 180 tekshe metrge deıin sýdy soryp shyǵara alady jáne ádette sorǵylar júktemege tótep bere almaıtyn erekshe agressıvti ortaǵa arnalǵan. Bizdiń ónimder taý-ken ónerkásibinde turaqty jáne qaýipsiz eńbek jaǵdaılaryn qamtamasyz etý úshin sý jáne basqa da joǵary abrazıvti massalardy aıdaýda qoldanylady, — dedi kásiporyn dırektory Erjan Danııarov.
KSP Steel óndiristi keńeıtip, tutas bólikti qubyrlardyń eksportyn ulǵaıtady: bir jyl ishinde sýmmý $90 mln-nan astam somaǵa kelisimshart jasaldy
Qazaqstandaǵy munaı ónerkásibine arnalǵan jiksiz qubyrlardyń jalǵyz óndirýshisi KSP Steel kompanııasy ónim túrlerin keńeıtip, eksport kólemin ulǵaıtyp keledi. Bul týraly kompanııanyń kommertsııalyq dırektory Baýyrjan Qojabekov málimdedi. Jylyna 300 myń tonnaǵa deıin ónim óndirýge qaýqarly kásiporyn AQSh-pen jalpy somasy $93 mln-nan asatyn kelisimsharttar jasasty. Qazirgi ýaqytta 4,5 myń tonna qubyr jóneltildi. Zaýyt ónimderi Kanadaǵa, Mysyrǵa, Ózbekstanǵa, Qyrǵyzstanǵa jáne Túrikmenstanǵa jetkiziledi.
— Biz Qazaqstan Respýblıkasy Prezıdentiniń ımportty almastyrý baǵdarlamasy aıasynda qoıǵan mindetterin tolyq oryndap otyrmyz. Іshki óndiris kólemin premıým sanattaǵy burandaly qosylystary bar qubyrlar, ishki betine korrozııaǵa qarsy jabyn jaǵylǵan qubyrlar sııaqty jańa segmentterde keńeıtýdi josparlap otyrmyz. Bul ónimder aldaǵy ýaqytta uńǵymalardy salý, burǵylaý, sondaı-aq kúrdeli jáne jerasty jóndeý jumystarynda qoldanylatyn bolady, — dedi Baýyrjan Qojabekov.
Qazaqstanda JI elementteri bar kompıýterlik platalardyń biregeı óndirisin iske qosý josparlanǵan
Kompıýterlik jáne servıstik tehnıkany shyǵaratyn Qazaq Investment Company kompanııasy jaqyn arada Qazaqstanda plata óndirisiniń tolyq tsıkliniń birinshi SMT-jelisin iske qosýdy josparlap otyr: elde jeke serverler, analyq platalar jáne jınaqtaǵyshtar shyǵarylatyn bolady.
— Bul joba bizge Memleket basshysynyń kompıýterlik tehnıkaǵa arnalǵan jıyntyqtaýyshtar boıynsha ımportty almastyrý salasyndaǵy baǵdarlamasyn júzege asyrýǵa múmkindik beredi. Sondaı-aq biz bolashaq platalarymyzda jasandy ıntellektti paıdalanýdy josparlap otyrmyz. Bul Prezıdenttiń qazaqstandyq ónimdegi jasandy ıntellekt mazmunynyń úlesin arttyrý jónindegi baǵdarlamasyna tikeleı sáıkes keledi, — dedi Qazaq Investment Company kompanııasynyń ókili Maqsat Ábishken.
Startap TrustExam.ai qyzmetkerlerdi attestattaý úshin ónerkásip sektoryna qashyqtan baqylaý júıesin engizdi
Qazaqstanda IT-sheshimderdi damytý aıasynda TrustExam.ai kompanııasy sertıfıkattaý, verıfıkatsııalaý jáne proktorıngpen emtıhan ótkizýdi qamtıtyn júıesin ónerkásiptik qaýipsizdik salasyna keńeıtti. Sheshim qyzmeti densaýlyq pen ómirge qaýip tóndiretin kásiporyndardaǵy qyzmetkerlerdiń biliminiń durystyǵyn rastaýǵa múmkindik beredi. Búginde ázirleme Reseı, Kanada, Úndistan jáne AQSh-ta qoldanylady.
«Gazpromneft» kásipornymen 5 jyldyq kelisimshart sheńberinde 3-4 aı ishinde reseılik kompanııanyń 100-ge jýyq qyzmetkeri qazaqstandyq ázirlemeni paıdalana otyryp, ónerkásiptik qaýipsizdikke attestattaýdan ótti.
