Qazaqstannyń halyqaralyq krıpto-naryqtaǵy áleýeti qandaı
ASTANA. KAZINFORM – Halyqaralyq krıpto-naryqta Qazaqstannyń áleýetti qandaı? Kóleńkeli aınalym men sheteldik alańdar arqyly júrgiziletin operatsııalar qalaı baqylanady?
Osy jáne ózge de saýalǵa Memlekettik kirister komıteti tsıfrlyq aktıvterdi ákimshilendirý basqarmasynyń jetekshisi Talǵat Ádilov jaýap berdi.
- Álem boıynsha kóptegen ıýrısdıktsııa krıpto-ındýstrııa salasyn retteýge tyrysyp jatyr. Biz úlken ósimniń saýdada, ıaǵnı satyp alý men satýda, bırjalyq mámilelerde bolyp jatqanyn kórip otyrmyz,- dedi Talǵat Ádilov komıtette ótken onlaın brıfıngte.
Sondaı-aq spıker aıyrbastaý pýnktterin damytý jáne ınvestıtsııa tartý josparymen bólisti.
- Aıyrbastaý pýnktterin engizý máselesi qarastyrylyp jatyr. Bul elimizde ósim dınamıkasyn beredi dep oılaımyz. Sonymen qatar token aktıvter qarastyrylyp jatqandyqtan, ıaǵnı belgili bir aktıvter tsıfrlyq formaǵa aýystyrylady. Bolashaqta olardy satyp alý men satý múmkin bolady, bul óz kezeginde ınvestıtsııa men salyq túsiminiń artýyna alyp keledi, - dep qosty T. Ádilov.
Sol sııaqty maman kóleńkeli aınalym men sheteldik alańdar arqyly júrgiziletin operatsııany baqylaýda maınıng salasyn retteý tetigin túsindirdi.
- Qazir maınıng salasyn retteý maınıng-pýl arqyly júzege asady. Buıryq aıasynda málimet alyp otyramyz. Aı saıyn óndirilgen kólem boıynsha málimet túsedi. Ózimiz de óndiristiń durystyǵyna esep júrgizemiz,- deıdi Kirister komıtetiniń ókili.
Odan bólek, basqarma basshysy kameraldyq baqylaýdyń tıimdiligin atap ótti.
- Pýldan alynǵan derekter aıasynda kameraldyq baqylaý júrgizdik, ol óziniń tıimdiligin jáne nátıjeliligin kórsetti. Sonyń aıasynda habarlama jiberilip, bıýdjetke qosymsha túsim qamtamasyz etildi. Bul pýldan alynǵan derektiń arqasynda júzege asty. Sondaı-aq retteý krıpto-bırja men AHQO (Astana halyqaralyq qarjy ortalyǵy) qatysýshylarynan málimet alý arqyly júzege asady. CARF aıasynda halyqaralyq krıpto-bırjadan tsıfrlyq aktıvterdiń aınalymy boıynsha derekter alýdy da josparlap otyrmyz. Bul jospar 2027 jylǵa belgilengen,- dedi T. Ádilov.
Buǵan deıin spıker Kirister komıteti tsıfrlyq maınıng naryǵyn qalaı baqylaý júrgizetini týraly aıtyp bergen edi.