Qazaqstannyń halyqaralyq qatynastarda is-qımyly jan-jaqty nyǵaıyp jatyr - Gennadıı Shıpovskıh

Senator Gennadıı Shıpovskıh Qazaqstanǵa Reseı prezıdenti Vladımır Pýtın resmı saparmen kelýine qatystyty pikir bildirdi, dep habarlaıdy Kazinform. 

«Qazir Astana barsha álem úshin dıplomatııalyq ortalyqtyń alańyna aınalǵany sózsiz. Muny tek Qazaqstan halqy ǵana emes, kúlli álem jurtshylyǵy kórip otyr. Jaqynda ǵana elimizge Frantsııa prezıdenti Emmanıýel Makron, Túrkııa prezıdenti Rejep Taııp Erdoǵan, sondaı-aq Ortalyq Azııadaǵy kórshiles elderdiń basshylary kelse, búgin Reseı prezıdenti Vladımır Pýtın resmı saparmen kelip jatyr. Atap aıtqanda, osynyń bári Qazaqstannyń halyqaralyq qatynastar baǵytynda is-qımyly jan-jaqty ári álemdik deńgeıde nyǵaıyp jatqanyn bildirip otyr. Birinshiden, osy boıynsha bizdi eshkim májbúrlep jatqan joq. Munyń bári bizdiń dıplomatııalyq jetistigimiz», - dedi Gennadıı Shıpovskıh.

Senatordyń aıtýynsha, Memleket basshysy Qasym-Jomart Toqaev elimizdiń múddesine qatysty, ıaǵnı ekonomıkalyq ári ınvestıtsııalyq ahýalyn nyǵaıtýǵa baǵyttalǵan qadamdardy jasap jatyr.

«Sondyqtan búgingi joǵary deńgeıde ótetin kezdesýlerde túrli saladaǵy taqyryptar qozǵalatyny anyq. Osynyń barlyǵy elimizdiń múddesin odan ári nyǵaıtýǵa, sondaı-aq halyqaralyq arenadaǵy deńgeıimizdi kúsheıtýge oń yqpal etedi», - dedi depýtat.

Búgin Qazaqstanǵa resmı saparmen Reseı prezıdenti Vladımır Pýtın kelgenin aıta keteıik. Sapar barysynda eki el basshylary kelissóz júrgizip, Qazaqstan men Reseı arasyndaǵy strategııalyq seriktestiktiń ózekti máselelerin talqylaıdy dep josparlanǵan.