Qazaqstannyń halyqaralyq avıatsııalyq saıasattaǵy múmkindigi keńeıedi — zań
ASTANA. KAZINFORM — Búgin Senattyń jalpy otyrysynda «Halyqaralyq azamattyq avıatsııa týraly konventsııanyń 50 a)-babyn ózgertýge qatysty hattamany jáne Halyqaralyq azamattyq avıatsııa týraly konventsııanyń 56-babyn ózgertýge qatysty hattamany ratıfıkatsııalaý týraly» Zań maquldandy.
Atalǵan hattamalar 2016 jylǵy 6 qazanda Halyqaralyq Azamattyq avıatsııa uıymy Assambleıasynyń 39-sessııasynda qabyldandy. Olar múshe memleketter quramynyń edáýir keńeıýin eskere otyryp, IKAO basqarý júıesin jetildirýge baǵyttalǵan.
— Ózgeristerge toqtalsaq, IKAO keńesiniń quramyn 36-dan 40 memleketke deıin ulǵaıtý eskerilgen. Bul múshe memleketterdiń neǵurlym ádil jáne geografııalyq teńgerimdi ókildigin qamtamasyz etýge múmkindik beredi. Ekinshiden, tehnıkalyq saraptamany kúsheıtý jáne IKAO-nyń normashyǵarmashylyq qyzmetiniń tıimdiligin arttyrý maqsatynda Aeronavıgatsııalyq komıssııa quramyn 19-dan 21 múshege deıin kóbeıtý kózdeledi. Bul ózgeristerdiń qajettiligi IKAO qurylǵan sátten bastap múshe memleketterdiń sany 52-den 193 memleketke deıin ulǵaıýyna, al uıymnyń negizgi basqarý organdarynyń sandyq quramy uzaq ýaqyt boıy qaıta qaralmaı, ózgerissiz qalýyna baılanysty, — dedi senator Bıbigúl Aqqojına.
2022 jyly IKAO Assambleıasynyń 41-shi sessııasynda qarar qabyldandy, onda múshe memleketter IKAO organdaryn reformalaý qajet ekenin moıyndady jáne tıisti hattamalardy jedel ratıfıkatsııalaýǵa shaqyrdy. Olardyń kúshine enýi úshin 128 ratıfıkatsııa qajet. Búgingi tańda bul ózgeristerdi 120 memleket ratıfıkatsııalady.
— Qazaqstan Respýblıkasy úshin hattamalardy resmı túrde bekitýdiń mańyzy zor. Bul elimizdiń halyqaralyq avıatsııalyq saıasatty qalyptastyrýǵa neǵurlym belsendi qatysýy úshin múmkindikterdi keńeıtýge, sondaı-aq IKAO organdarynyń quramyna kandıdatýramyzdy yqtımal ilgeriletý úshin alǵysharttar jasaýǵa múmkindik beredi. Atalǵan zańdy qabyldaý — Konventsııa aıasynda azamattyq avıatsııany halyqaralyq-quqyqtyq retteýdiń tıimdiligin arttyrý, halyqaralyq standarttar men IKAO-nyń usynylatyn praktıkasyn saqtaý, sondaı-aq sapaly jáne senimdi avıatsııalyq qyzmet kórsetýdi qamtamasyz etý. Sonymen birge, zańdy qabyldaý Qazaqstan Respýblıkasynyń qoldanystaǵy zańnamasyna ózgerister engizýdi talap etpeıdi, respýblıkalyq bıýdjetten qosymsha qarjylyq shyǵyndarǵa ákep soqpaıdy jáne teris áleýmettik-ekonomıkalyq, quqyqtyq saldarlary joq, — dedi depýtat.
Aıta keteıik, bıyl Qazaqstan Kólik mınıstrliginiń Azamattyq avıatsııa komıtetiniń tóraǵasy Saltanat Tompıeva Halyqaralyq azamattyq avıatsııa uıymynyń (IKAO) Bas hatshysy Hýan Karlos Salazardyń sheshimimen IKAO-nyń Ǵalamdyq elshiler baǵdarlamasy aıasynda elshi bolyp taǵaıyndaldy.
