«Qazaqstannyń halyq jazýshysyna» aı saıyn qansha aqsha tólenedi

Mádenıet jáne aqparat vıtse-mınıstri Arman Júdebaev memlekettik mekemelerde qyzmet etip júrgen «Qazaqstannyń halyq jazýshysy» ataǵyn alǵandarǵa tıisti ústemeaqy qarastyrylǵanyn aıtty, dep habarlaıdy Kazinform tilshisi.

«Qazaqstannyń halyq jazýshysy» ataǵy – elimizdiń ádebıetin damytýǵa erekshe úles qosqan, buryn «Qazaqstannyń eńbek sińirgen qaıratkeri» jáne ádebıet salasyndaǵy Qazaqstan Respýblıkasy Memlekettik syılyǵynyń laýreaty atanǵan tulǵalarǵa beriledi.

Sondaı-aq, ult ádebıetin jańa deńgeıge kótergen, ádebı shyǵarmashylyq ortanyń eń joǵarǵy syılyǵy bolady.

Senattyń jalpy otyrysynan keıingi baspasóz máslıhatynda vıtse-mınıstr Arman Júdebaev osy ataqty alǵan jazýshyǵa qandaı materıaldyq tólem aýdarylatynyn aıtty.

Bul dáreje Respýblıka kúni qarsańynda beriletin bolady.

«Halyq jazýshysy» ataǵy ádebıet salasyndaǵy eń joǵary ataq bolmaq. Úkimettiń tıisti qaýlysy bar. Bul turǵyda ol kisiler memlekettik mekemede jumys istese, onda tıisti ústemaqy tólenedi. Al jumys istemese, tólem jasalmaıdy. Jalpy, bul rette eshqandaı qarjylyq esep qarastyrylmaǵan. Bul kisiler Mádenıet jáne aqparat mınıstrliginiń tıisti memlekettik mekemelerinde qyzmet etse, 17 954 teńge somasynda ústemaqy alady», - dedi vıtse-mınıstr.

Aıta keteıik, búgin Senat «Qazaqstan halyq jazýshysy» ataǵyn qaıtaratyn zańdy maquldady. 

Bıyl maýsym aıynda Ulttyq quryltaıdyń negizgi otyrysynda Prezıdent Qasym-Jomart Toqaev «Qazaqstannyń Halyq jazýshysy» ataǵyn qaıtarýdy tapsyrǵan edi.