Qazaqstannyń halyq jazýshysy Israıl Saparbaı ómirden ozdy

ASTANA. KAZINFORM — Qazaqstannyń halyq jazýshysy, asa kórnekti ult aqyny, talantty sazger Israıl Saparbaı 85 jasyna qaraǵan shaǵynda qaıtys boldy.

Bul týraly qazaqstandyq aqyn, jýrnalıst, etnograf Qasymhan Begmanov habarlady.

— Búgin tańnan sýyq habar jetti. Tańǵy saǵat tórt shamasynda 85 jasyna qaraǵan shaǵynda Qazaqstannyń halyq jazýshysy, Táýelsiz «Platınaly Tarlan» syılyǵynyń laýreaty, asa kórnekti ult aqyny, belgili dramatýrg, talantty sazger Israıl Saparbaı aǵamyz dúnıeden ótti. Iá, saǵat tili qasıetti jumaǵa qaraı aýǵanda aqynnyń sońǵy demi úzildi. Uly aqynnyń Qaskeleńdegi qara shańyraǵynda, bala-shaǵasynyń aldynda aýyr naýqastan qaıtqany jaıly habardy maǵan aǵamyzdyń uly Nurlan Israıluly baýyrym habarlady. Qazaqstan Jazýshylar odaǵynyń Tóraǵasymen birge aǵamyz qatty aýyryp jatqanda, aýrýhanaǵa baryp, únemi habar alyp turdyq. Sońǵy barǵanymyzda kúbirlep, aqyryn óz óleńin oqyp jatty…, — dep jazdy ol áleýmettik jelidegi paraqshasynda.

Qasymhan Begmanovtyń sózinshe, asa kórnekti lırık aqyn Israıl Saparbaıdyń artynda qanshama ánderi, laǵyldaı, móldiregen jaquttaı poezııasy, máńgi ólmes syrly, muńly jyrlary qaldy.

— Jazǵan pesalary M.Áýezov teatrynan bastap elimizdiń birneshe teatrlarynda sahnalanyp, otty jyrlary óz oqyrmandaryn taýyp, ásem ánderi mıllıondardyń júregine jetip, qazaq aspanynda qalyqtap tur. Janyńyz jánnatta bolsyn, asyl aǵa, jan aǵa, — dep jazdy Begmanov.

Buǵan deıin qazaq medıtsınasynyń ańyzy Nına Kaıýpova dúnıeden ótkenin jazǵanbyz.