Qazaqstannyń Halyq partııasy: Alda el ıgiligi úshin aýqymdy jumys tur
ASTANA. KAZINFORM — Qazaqstannyń Halyq partııasynyń tóraǵasy Nursultan Shoqanov saılaý qorytyndysyna qatysty úndeý jasady.
— Saılaý naýqany boıy aıanbaı eńbek etip, tabandylyq pen adaldyq tanytqan Qazaqstannyń Halyq partııasynyń partııa músheleri, belsendileri, baıqaýshylarynyń árqaısysyna shyn júrekten alǵys aıtamyn. Óńirlik shtabtar, eriktiler, zańgerler men baıqaýshylar — sizder orasan zor jumys atqaryp, ár aýla men ár kásiporynǵa deıin jettińizder. Osylaısha partııamyzdyń eńbek adamdarynyń múddesin qorǵaýǵa daıyn, bir maqsattaǵy uıymshyl komanda ekenin dáleldedińizder, — dedi Nursultan Shoqanov.
Onyń aıtýynsha, Qazaqstannyń Halyq partııasy Memleket basshysy Qasym-Jomart Kemeluly Toqaevtyń aýqymdy saıası jańǵyrtý jáne Ádiletti Qazaqstan qurý baǵytyndaǵy strategııalyq baǵytyn tolyq qoldaıdy.
— Áleýmettik ádilettilik, múmkindikter teńdigi jáne bıliktiń esep berýi qaǵıdattary bizdiń baǵdarlamamyzben úndesedi. Biz memlekettik damýdyń jańa kezeńinde Prezıdent reformalaryna senimdi ári syndarly tirek bolýǵa daıynbyz. Partııalyq qaǵıdattarǵa degen adaldyǵyńyz, jigerińiz ben aýyzbirshiligińiz úshin raqmet! Alda eldiń jáne árbir qazaqstandyqtyń ıgiligi úshin atqaratyn aýqymdy jumys tur! — dep atap ótti Halyq partııasynyń tóraǵasy.
Buǵan deıin «Ádilet» partııasynyń tóraǵasy Aıbek Dádebaı saılaý qorytyndysy boıynsha saılaýshylarǵa úndeý jasady.
Sondaı-aq Respublica partııasy exit poll nátıjelerine qatysty pikir bildirdi.
«Aýyl» partııasynyń tóraǵasy Qaırat Aıtýǵanov saılaýdyń ashyq ári uıymdasqan túrde ótkenin atap ótti.
Jalpyulttyq sotsıal-demokratııalyq partııasynyń tóraǵasy Ashat Raqymjanov saılaýdyń alǵashqy nátıjesine pikir bildirip, halyqtyń senim mandatyna ıe bolǵandaryn aıtty.
Sonymen qatar «Aq jol» partııasynyń tóraǵasy Danııa Espaeva saılaý nátıjesine qatysty málimdeme jasap, saılaý ashyq ári ádil ótkenin alǵa tartty.
