Qazaqstannyń halyq ártisi Rıhangúl Mahpırova 79 jasynda dúnıeden ótti
ASTANA. KAZINFORM – 79 jasynda Qazaqstannyń halyq ártisi, kórnekti óner qaıratkeri Rıhangúl Mahpırova ómirden ótti.
Onyń shyǵarmashylyq joly Qudys Qojamııarov atyndaǵy respýblıkalyq memlekettik akademııalyq uıǵyr mýzykalyq komedııa teatrynda 1977 jyly bastalǵan. Kóp jyldyq eńbegi barysynda ol qazaq teatr óneriniń altyn qoryna engen san alýan kórkem, aıshyqty jáne este qalarlyq beınelerdi jasady.
Mádenıet salasyna sińirgen zor eńbegi úshin Rıhangúl Mahpırova Qazaqstan Respýblıkasynyń eńbek sińirgen ártisi jáne Qazaqstannyń halyq ártisi ataqtarymen marapattalǵan.
QR Mádenıet jáne aqparat mınıstrligi marqumnyń otbasy men jaqyndaryna, ónersúıer qaýymǵa qaıǵyra kóńil aıtady.
- El tanymal óner qaıratkerinen aıyryldy. Marqumnyń jarqyn beınesi júrekterde máńgi saqtalady, - delingen vedomstvo aqparatynda.
Aıta keteıik, jaqynda qazaq ádebıetiniń asa kórnekti ókili Kúlásh Ahmetova ómirden ozǵan bolatyn.