Qazaqstannyń halyq ártisi Esmuhan Obaev dúnıeden ozdy

ASTANA. KAZINFORM — Belgili akter, teatr rejısseri, professor, platınaly «Tarlan» táýelsiz syılyǵynyń, «Parasat» jáne «Barys» ordenderiniń ıegeri, memlekettik stıpendııanyń laýreaty Esmuhan Obaev qaıtys boldy. Bul týraly QR Mádenıet jáne aqparat mınıstrligi habarlady.

Mınıstrlik Qazaqstannyń halyq ártisi Esmuhan Nesipbaıuly Obaevtyń dúnıeden ótýine baılanysty otbasy men jaqyn týystaryna, týǵan halqyna qaıǵyra kóńil aıtady. 

— Esmuhan Nesipbaıuly sanaly ǵumyryn qazaq teatr óneriniń damýyna, sahna mádenıetiniń órkendeýine, ulttyq rejıssýra men akterlik mekteptiń qalyptasýyna arnaǵan kórnekti tulǵa bolatyn. Ult mádenıetiniń mereıin ósirgen, teatr óneriniń abyroıyn asqaqtatqan ardaqty azamat qaı kezeńde de ónerge adaldyqtyń, kásibine jaýapkershiliktiń úlgisin kórsete bildi. Ol tárbıelegen býyn, sahnalaǵan týyndylar men qalyptastyrǵan kórkemdik ustanym qazaq teatrynyń altyn qorynda qala bermek. Ulttyq mádenıettiń damýyna súbeli úles qosqan Esmuhan Nesipbaıulynyń jarqyn beınesi, shyǵarmashylyq murasy men ǵıbratty ǵumyr joly halqymyzdyń jadynda máńgi saqtalady dep senemiz. Marqumnyń jany jánnatta, ımany salamat, topyraǵy torqa bolsyn! — delingen habarlamada.

Budan buryn talantty óner ıesi, aıtys aqyny Kádirhan Qızatuly ómirden ozǵanyn jazǵan edik.