Qazaqstannyń halyq aqyny Sáttiǵul Janǵabylulynyń 150 jyldyq mereıtoıy respýblıkalyq deńgeıde atalyp ótiledi
ASTANA. KAZINFORM — Qazaqstannyń halyq aqyny Sáttiǵul Janǵabylulynyń 150 jyldyq mereıtoıy respýblıkalyq deńgeıde atalyp ótiledi. Bul jaıynda Senat depýtattarynyń saýalyna Premer-mınıstr Olja Bektenovtiń jaýabynda aıtylǵan.
— 2026-2028 jyldarǵa arnalǵan respýblıkalyq deńgeıde atalyp ótiletin mereıtoılar men ataýly kúnder jospary aıasynda Sáttiǵul Janǵabylulynyń 150 jyldyq mereıtoıyn atap ótý kózdelip otyr. Sonymen qatar Sáttiǵul Janǵabylulynyń 150 jyldyq mereıtoıyn 2026 jylǵy jalpy respýblıkalyq mereıtoılar tizbesine engizý jáne ony daıyndaý men ótkizý boıynsha arnaıy is-sharalar josparyn Mańǵystaý oblysynyń ákimdigi tarapynan ázirleý jumystary júrgizilýde. Іs-sharaǵa qarajat qarastyrý maslıhattyń kezekti otyrysyna josparlanǵan, — dedi Úkimet basshysy.
Premer-mınıstr dereginshe, is-shara josparyna Aqtaý qalasynda «Jyr-ǵumyr» qalalyq jyrshylar baıqaýy jáne «Muhıttan qalmysh teńiz-jyr» respýblıkalyq jyrshylar konkýrsy, «Dala daýysy — jyr murasy» atty oblystyq ǵylymı konferentsııa, Jańaózen qalasynda oqýshylar arasyndaǵy jyr baıqaýlary men jyrshylar saıystary, Beıneý aýdanynda «Úsh jyrdyń úni: Qashaǵan, Qalnııaz, Sáttiǵul» oblystyq jyrshylar saıysy jáne «Sáttiǵuldyń toqsan tolǵaýy» ádebı-sazdy keshi jáne Mańǵystaý, Túpqaraǵan, Qaraqııa aýdandarynda jyr keshterin, tanymdyq sharalar jáne dástúrli án-jyr baıqaýlaryn engizý kózdelgen.
— Atalǵan is-sharalar aqynnyń shyǵarmashylyq murasyn keńinen nasıhattaýǵa, jyrshylyq dástúrdiń sabaqtastyǵyn saqtaýǵa, jas ónerpazdardy qoldaýǵa jáne ulttyq rýhanı qundylyqtardy dáripteýge baǵyttalady, — dedi Oljas Bektenov.
Sáttiǵúl Janǵabyluly (1876–1966) Mańǵystaý oblysynda dúnıege kelgen. Atyraý tóńireginiń ataqty aqyndaryn (Abyl, Qashaǵan, Nurym, Qalnııaz) ustaz tutyp, ónege alǵan. 1896, 1910 jyldardaǵy jutta, 1916 jylǵy maýsym jarlyǵynda kúızelgen eldiń aýyr halin, sharýanyń muńyn jyrlaǵan. 1937 jyly Almatyda ótken kórkemónerpazdar sletine, 1939 jyly Máskeýdegi Búkilodaqtyq aýyl sharýashylyǵy kórmesiniń ashylý saltanatyna, Qazaqstan jazýshylarynyń ekinshi sezine, 1943, 1957 jyldardaǵy aqyndar aıtysyna, Abaıdyń, Jambyldyń 100 jyldyq toılaryna qatysyp, jyr tolǵaǵan.
1961 jyly «Qazaq KSR-iniń halyq aqyny» qurmetti ataǵy berilgen. Qazaq KSR Joǵarǵy keńesiniń Qurmet gramotasymen marapattalǵan.
Aıta ketelik Belgili qyrǵyz jazýshysy Shyńǵys Aıtmatovtyń qaryndasy Roza Aıtmatova Qyrǵyzstan úkimetine jazýshynyń 2028 jyly josparlanǵan 100 jyldyǵyn toılamaýdy surap, ótinish joldaǵan edi.