Qazaqstannyń halyq aqyny Ásııa Berkenova dúnıeden ótti
ASTANA. KAZINFORM – Qazaqstannyń halyq aqyny Ásııa Berkenova 77 jasqa qaraǵan shaǵynda dúnıeden ótti. Qaraly habardy Quryltaı depýtaty, aqyn Janarbek Áshimjan jetkizdi.
Janarbek Áshimjan áleýmettik jelidegi jazbasynda aqynnyń ómirden ótýi qazaq óneri men mádenıeti úshin aýyr qaza ekenin atap ótip, marqumnyń týǵan-týystaryna, áriptesteri men shákirtterine kóńil aıtty.
– Qazaqstannyń Halyq aqyny, aıaýly Apamyz Ásııa Berkenova 77 jasqa qaraǵan shaǵynda dúnıeden ótti. Ókinishti… Alla áıgili Tulǵanyń ımanyn joldas, aldyn peıish, artyn kenish qylǵaı. Ásııa Áıipqyzymen atamura ónerimizdiń bútin bir dáýiri ketip barady… – dep jazdy Janarbek Áshimjan.
Sondaı-aq ol sanaly ǵumyryn qazaq óneri men mádenıetine arnaǵan aqynnyń jarqyn beınesi el jadynda máńgi saqtalatynyn jetkizdi.
– Barsha áriptesterine, aǵaıyn-týystaryna, shákirtterine, artyndaǵy el-halqyna qaıǵyryp kóńil aıtamyz. Bar ǵumyryn Qazaqtyń óneri men mádenıetine arnaǵan asyl jannyń beınesi janymyz barda jadymyzda saqtalady. Baqul bolyńyz, Apa… – dedi ol.
Aqyn III dárejeli «Barys» jáne «Qurmet» ordenderimen marapattalǵan.