Qazaqstannyń Gvıneıa-Bısaýǵa dándi-daqyldardy eksporttaý múmkindigi mol – Toqaev

ASTANA. KAZINFORM – Qazaqstan Prezıdenti Gvıneıa-Bısaýdyń joǵary deńgeıdegi delegatsııasyn kelesi jyly ótetin Astana halyqaralyq forýmyna shaqyrdy. Bul týraly elimizge resmı saparmen kelgen Gvıneıa-Bısaý Prezıdenti Ýmarý Sısoký Embalomen kelissózderden keıingi birlesken málimdeme barysynda Memleket basshysy Qasym-Jomart Toqaev aıtty.

- Aýyl sharýashylyǵy salasyndaǵy seriktestik kelissózderdegi basty taqyryptardyń biri boldy. Qazaqstannyń Gvıneıa-Bısaýǵa dándi daqyldy eksporttaýǵa qatysty múmkindigi mol ekenine nazar aýdardyq. Bul rette elimizdiń bastamasymen qurylǵan Azyq-túlik qaýipsizdigi jónindegi Islam uıymynyń áleýetin tolyq paıdalanýǵa bolady. Sonymen qatar taý-ken jáne tabıǵı resýrstardy ıgerý isindegi yntymaqtastyq máselelerin talqyladyq. Atap aıtqanda, temir, fosfat jáne basqa sırek kezdesetin mıneral kenishterin barlaý jáne ıgerý úshin birlese jumys isteýge zor múmkindik bar, - dedi Qazaqstan Prezıdenti.

Memleket basshysy mártebeli meımanmen Qazaqstannyń jańa tehnologııalar salasyndaǵy jańalyqtarymen bóliskenin atap ótti.

- Ásirese, tsıfrlandyrý, kıberqaýipsizdik jáne fınteh baǵytyndaǵy jetistikterimizge toqtaldym. Osy oraıda tsıfrlyq qyzmet salasyndaǵy yqpaldastyqty arttyrýdy usyndym. Gvıneıa-Bısaýdyń joǵary deńgeıdegi delegatsııasyn kelesi jyly ótetin Astana halyqaralyq forýmyna shaqyrdym. Bul Qazaqstannyń ekonomıkalyq jáne ınvestıtsııalyq áleýetimen tolyq tanysýǵa múmkindik beredi, - dedi Qasym-Jomart Toqaev.

Buǵan deıin Memleket basshysy Qasym-Jomart Toqaev Aqordada elimizge resmı saparmen kelgen Gvıneıa-Bısaý Prezıdenti Ýmarý Sısoký Embalony saltanatpen qarsy alǵanyn jazǵan edik.

Keńeıtilgen quramdaǵy kelissóz barysynda Qasym-Jomart Toqaev Qazaqstan Gvıneıa-Bısaýdy Afrıka qurlyǵyndaǵy mańyzdy seriktes retinde qarastyratyndyǵyn aıtty.

Kelissózder barysynda eki eldi basshylary Bısaý porty men Transkaspıı dálizin ushtastyrý joldaryn zerdeleýge kelisti.