Qazaqstannyń farmatsevtıka salasyna tartylǵan ınvestıtsııa kólemi úsh jylda úsh eseden astam ósti
ASTANA. KAZINFORM — Sońǵy úsh jylda Qazaqstandaǵy farmatsevtıkalyq óndiriske tartylǵan ınvestıtsııa kólemi úsh eseden astam ósip, 142,8 mln AQSh dollaryna jetti.
Bul týraly QR Densaýlyq saqtaý mınıstrliginiń alqa otyrysynda Densaýlyq saqtaý mınıstriniń birinshi orynbasary Tımýr Sultanǵazıev málimdedi.
— Eger 2023 jyldyń qorytyndysy boıynsha salaǵa tartylǵan ınvestıtsııa kólemi 46,9 mln AQSh dollaryn qurasa, 2024 jyly bul kórsetkish 91,3 mln dollarǵa deıin ósti. Al 2025 jyly ınvestıtsııalyq belsendilik saqtalyp, ınvestıtsııa kólemi 142,8 mln AQSh dollaryna jetti, — dedi Tımýr Sultanǵazıev.
Onyń aıtýynsha, ınvestıtsııalar óndiris oryndaryn jańǵyrtýǵa, óndiristik qýattardy keńeıtýge jáne dárilik zattar men medıtsınalyq buıymdardy jergiliktendirýge baǵyttalǵan.
— Bul ınvestorlardyń Qazaqstannyń farmatsevtıka salasyna degen seniminiń artyp kele jatqanyn jáne memlekettik qoldaý sharalarynyń tıimdiligin kórsetedi, — dep atap ótti birinshi vıtse-mınıstr.
Densaýlyq saqtaý mınıstrligi ishki naryqtaǵy otandyq dárilik zattar men medıtsınalyq buıymdardyń úlesin arttyrý jumystaryn jalǵastyryp keledi.
Resmı málimetke sáıkes, otandyq ónimniń qundyq mándegi úlesi 2023 jyly 14,4 paıyzdy, 2024 jyly 15,1 paıyzdy, al 2025 jyly 15 paıyzdy qurady.
Sonymen qatar dárilik zattardy tańbalaý jáne qadaǵalaý júıesin engizý otandyq óndirýshilerdiń naryqtaǵy naqty úlesiniń áldeqaıda joǵary ekenin kórsetti.
— 2024 jylǵy 1 shildeden bastap engizilgen tańbalaý jáne qadaǵalaý júıesi aıasynda qazaqstandyq óndirýshilerdiń tabıǵı kólemdegi úlesi 39,8 paıyzǵa jetti, — delingen habarlamada.
Sondaı-aq 2025 jyly Biryńǵaı dıstrıbıýtor arqyly satyp alynǵan otandyq óndiris ónimderiniń úlesi 32 paıyzdy qurady.
Vedomstvonyń málimetinshe, bul kórsetkishter jergilikti óndiristiń damyp kele jatqanyn jáne eldiń dárilik qaýipsizdiginiń nyǵaıǵanyn ańǵartady.
Alqa otyrysynyń qorytyndysynda Qazaqstan Respýblıkasynyń densaýlyq saqtaýdy damytýdyń 2029 jylǵa deıingi tujyrymdamasy aıasynda halyqty dárilik zattarmen qamtamasyz etý boıynsha keshendi sharalar jalǵasatyny atap ótildi.
Aıta keteıik, elde otandyq farmatsevtıkalyq ónimderge suranys artyp keledi.
