Qazaqstannyń esirtkige qarsy tsıfrlyq tájirıbesi sheteldikterdi qyzyqtyrdy
ASTANA. KAZINFORM — Sheteldik sarapshylar Qazaqstannyń esirtkimen kúrestegi tsıfrlyq tájirıbesine qyzyǵýshylyq tanytyp otyr. Bul týraly BUU-nyń Esirtki jáne qylmys basqarmasynyń Qazaqstandaǵy ulttyq konsýltanty jáne «Esbol Qory» qorynyń jetekshisi Jandos Aqtaev aıtty.
— Jaqynda BUU-nyń Venadaǵy shtab-páterinde ótken Esirtki zattary jónindegi komıssııa otyrysyna qatystym. Onda esirtki bıznesine qarsy tıimdi tásilder talqylandy. Ortalyq Azııa elderiniń atynan baıandama jasap, Qazaqstannyń tájirıbesin tanystyrdym. Bizdiń qorda jasandy ıntellekt qoldanylatyn «Mergen» júıesi bar. Ol 5 myńnan astam zańsyz onlaın-esirtki dúkenin buǵattaýǵa múmkindik berdi. Júıege Shyǵys Eýropa, Orta Azııa elderi qyzyqty, — dedi spıker Jibek Joly telearnasynyń «Búgin Live» baǵdarlamasynda.
Buǵan deıin eriktiler qalalarda esirtki jarnamasy jazylǵan graffıtılerdi joıýmen aınalysqan. Alaıda bul tásildiń tıimdiligi tómen bolǵan, sebebi jazbalar Telegram jáne basqa da áleýmettik jelilerdegi onlaın-dúkenderge silteme bergen. Sondyqtan uıym zańsyz onlaın-resýrstardy anyqtap, olardy tolyq buǵattaýǵa kóshken.
— Qor quramynda aqparattyq qaýipsizdik salasynyń mamandary jumys isteıdi. Aldymen esirtki satatyn onlaın-dúkenderdi buǵattadyq, keıin zańsyz kontentpen kúreske kiristik. Qor ataýy Abaı Qunanbaıulynyń 19-qara sózindegi «Esti bol» degen oıdan shyqqan. Uıym qurylǵanyna úsh jyl boldy, osy baǵyttaǵy jumysymyz júıeli túrde jalǵasyp keledi, — dedi Jandos Aqtaev.
Qor tek esirtkimen kúrespeı, qoǵamdaǵy ózge táýeldilik túrlerin de zertteıdi. Sonyń biri — lýdomanııa.
— Biz jalpylama statıstıka jasap, táýeldi adamdardyń portretin anyqtadyq. Osy negizde memlekettik jáne ǵylymı mekemelerge usynystar ázirlendi. Nátıjesinde oıyn bıznesine qarsy keshendi jospar qabyldandy, — dedi spıker.
Jandos Aqtaev táýeldilikpen kúreste kásibı mamandar men ǵylymı bazanyń mańyzyn da atap ótti.
— Addıktolog mamandardy daıarlaý qajet. Qazir olar kóbine shetelden keledi, sondyqtan elimizde atalǵan tájirıbeni damytý kerek. Qoǵamda synı oılaý qabiletin qalyptastyrý da asa mańyzdy, — dedi ol.
Spıker ınternet-alaıaqtyq máselesine de toqtaldy. Onyń aıtýynsha, sońǵy jyldary bul baǵyttaǵy shyǵyn shash etekten.
— 2024-2025 jyldary qazaqstandyqtar alaıaqtardyń kesirinen 20 mlrd teńgeden astam qarjysyn joǵaltty. Qazir ІT tehnologııalary arqyly aldyn alý jobalary júrgizilýde. Sonyń biri — Meta kompanııasynyń platformalarymen birlesken bastamalar. Biz azamattardy jelide qorǵaýǵa baǵyttalǵan aldyn alý tetikterin engizgimiz keledi. Qor — Ortalyq Azııada Meta kompanııasymen áriptestik ornatqan alǵashqy kommertsııalyq emes uıym. Qazir «Ras pa?» atty jobany jetildirý ústindemiz, — dedi spıker.
Buǵan deıin elimizde 17,5 myń adamnyń esirtkige táýeldi ekeni aıtylǵan bolatyn.
