Elimizde jańartylatyn energııa úlesi 6 jylda 4 ese ósti
ASTANA. KAZINFORM - Qazaqstanda jańartylatyn energetıka sektoryn júıeli damytý jumystary júrip jatyr. Sońǵy alty jylda eldiń energııa teńgerimindegi jańartylatyn energııa kózderi (JEK) obektileri óndiretin elektr energııasynyń úlesi tórt esege – 2%-dan 8%-ǵa deıin ósti.
QR Energetıka mınıstrligi baspasóz qyzmetiniń habarlaýynsha, kórsetkishtiń ósýi memlekettik saıasattyń júıeli sharalaryn iske asyrý, JEK jobalaryn irikteý boıynsha aýktsıondar ótkizý, ınvestıtsııalar tartý jáne jańa generatsııalaý qýattaryn iske qosý nátıjesinde qamtamasyz etildi.
Búginde elimizde jalpy belgilengen qýaty 3,8 GVt-tan asatyn 172 JEK nysany jumys isteıdi. Onyń ishinde 71 jel elektr stantsııasy jáne 54 kún elektr stantsııasy bar. Sonymen qatar 44 gıdroelektr stantsııasy jáne úsh bıogaz stantsııasy jumys istep tur.
2025 jyldyń qorytyndysy boıynsha JEK nysandary 8,6 mlrd kVt·saǵ elektr energııasyn óndirdi. Bir jyl ishinde jalpy qýaty 500 MVt-tan asatyn toǵyz jańa nysan paıdalanýǵa berildi.
Salany damytý jumystary 2026 jyly da jalǵasýda. Bıyl jalpy qýaty 245 MVt bolatyn taǵy 10 JEK nysanyn iske qosý josparlanǵan. Onyń ishinde tórt jel elektr stantsııasy, bes kún elektr stantsııasy jáne bir gıdroelektr stantsııasy bar. Jyl qorytyndysy boıynsha jańartylatyn energııa kózderinen óndiriletin elektr energııasynyń kólemi 8,8 mlrd kVt·saǵ-qa jetedi dep kútilýde.
Jaqyn perspektıvada jalpy qýaty 3,6 GVt bolatyn shamamen 100 jobany iske asyrý josparlanýda. Budan bólek, jalpy qýaty taǵy 4 GVt bolatyn iri JEK jobalary pysyqtalyp jatyr.
-Salaǵa TotalEnergies, China Power, Masdar jáne China Energy sııaqty iri halyqaralyq ınvestorlar tartyldy. Olardyń qatysýy zamanaýı tehnologııalar men ınvestıtsııalardy tartýǵa, sondaı-aq jańa generatsııalaý qýattaryn ulǵaıtýǵa múmkindik beredi.
Aldaǵy ýaqytta bul sharalar eldiń energııa teńgerimindegi taza energetıkanyń úlesin arttyrýǵa, energetıkalyq júıeniń turaqtylyǵyn qamtamasyz etýge jáne energetıkalyq qaýipsizdikti nyǵaıtýǵa múmkindik beredi,-delingen habarlamada.
Osyǵan deıin 2027 jyly Qazaqstanda 845 MVt jańa energetıkalyq qýat iske qosylatyny týraly jazdyq.
