Qazaqstannyń energııa teńgerimindegi JEK úlesi 6%-dan asty
ASTANA. KAZINFORM – 2024 jyldyń qorytyndysy boıynsha Qazaqstanda jańartylatyn energııa kózderinen (JEK) óndiriletin elektr energııasynyń úlesi 6%-dan asyp, 6,43%-dy qurady. Bul — 2020 jylǵy kórsetkishpen salystyrǵanda eki ese joǵary.
Energetıka mınıstrliginiń dereginshe, ol kezde JEK úlesi nebári 3% bolǵan. Bul ósim «jasyl» ekonomıkany damytýǵa baǵyttalǵan memlekettik baǵdarlamalardyń júıeli júzege asyrylyp jatqanyn aıqyn kórsetedi.
Sońǵy bes jylda elde turaqty oń úrdis baıqalyp keledi:
- 2021 jyly – 3,69%,
- 2022 jyly – 4,53%,
- 2023 jyly – 5,92%,
- 2024 jyly – 6,43%.
«Jasyl» elektr energııasyn óndirý kóleminiń artýy jańartylatyn energııa kózderi sektoryndaǵy ınvestıtsııalyq ahýaldy jaqsartýǵa baǵyttalǵan dáıekti memlekettik saıasattyń nátıjesi bolyp otyr. Ozyq halyqaralyq tájirıbeler engizilip, júıeli qoldaý sharalary júzege asyrylýda, al nysandardyń qurylysy men paıdalanýǵa berilýi ınvestorlardyń qarajaty esebinen iske asýda.
Búginde respýblıka aýmaǵynda jalpy qýaty 3 GVt-tan asatyn 154 JEK nysany jumys isteıdi. Atap aıtqanda:
- 63 jel elektr stantsııasy (1 570,05 MVt),
- 46 kún elektr stantsııasy (1 222,61 MVt),
- 42 sý elektr stantsııasy (287,685 MVt),
- 3 bıogaz stantsııasy (1,77 MVt).
Jańartylatyn energııa kózderin damytý — elimizdiń turaqty energııamen qamtamasyz etý jáne klımattyń ózgerýine qarsy is-qımyl salasyndaǵy memlekettik saıasatynyń negizgi basymdyqtarynyń biri.
Aıta keteıik, Qyzylorda oblysynda balamaly energııa kózderin paıdalaný damyp keledi.