Qazaqstannyń eńbek sińirgen qaıratkeri Aǵymsaly Dúzelhanov dúnıeden ozdy

ASTANA. KAZINFORM — Qazaqstannyń eńbek sińirgen qaıratkeri, Memlekettik syılyqtyń laýreaty, professor Aǵymsaly Dúzelhanov qaıtys boldy, dep habarlaıdy Mádenıet jáne aqparat mınıstrliginiń baspasóz qyzmeti.

Mınıstrlik qazaq beıneleý óneriniń kórnekti ókili, Qazaqstannyń eńbek sińirgen qaıratkeri, Memlekettik syılyqtyń laýreaty, professor Aǵymsaly Dúzelhanuly Dúzelhanovtyń mezgilsiz dúnıeden ótýine baılanysty orny tolmas qazaǵa ortaqtasyp, otbasy men týǵan-týystaryna, týǵan halqyna qaıǵyryp kóńil aıtady.

— Aǵymsaly Dúzelhanuly — beıneleý ónerinde ózindik qoltańbasymen daralanǵan biregeı sýretshi. Ol shyǵarmalary arqyly halqymyzdyń rýhyn, zamana tynysyn aıshyqtap, ulttyq ónerimizdiń kókjıegin keńeıte tústi. Urpaq tárbıesine de ólsheýsiz eńbek sińirip, talaı jas sýretshiniń kásibı jolyn aıqyndaýyna jol ashty. Ómirden ozǵanyna qaramastan, onyń mol murasy men jarqyn beınesi halqymyzdyń júreginde máńgilik saqtalady. Marqumnyń jany jánnatta, ımany salamat bolsyn, — delingen habarlamada.

Budan buryn belgili jýrnalıst Muhtar Túmenbaı 55 jasqa qaraǵan shaǵynda qaıtys bolǵanyn jazǵanbyz.