Qazaqstannyń eńbek naryǵyn jasandy ıntellekt ózgerte me
ASTANA. KAZINFORM – QR Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Rostıslav Konıashkın eńbek naryǵyna jasandy ıntellekt áser etip jatqanyn aıtty.
Vıtse-mınıstrdiń sózine qaraǵanda, jasandy ıntellekt analıtıkalyq salalarǵa - skorıngke, qujattardy óńdeýge áser etip otyr. Munymen qosa, qazirdiń ózinde koll-ortalyqtardy almastyryp jatqan ártúrli konsýltatsııalarǵa, sondaı-aq zańgerlik keńesterge yqpal etip jatyr.
«Qazir norma shyǵarý qyzmetine arnalǵan chat-bot jasap jatyrmyz. Densaýlyq saqtaýda, ıaǵnı dıagnostıka salasynda tabysty jobalar bar. Atap aıtqanda, eńbek naryǵynda qysqartýlar emes, jumys sıpatynyń ózgerýi bolady», - dedi R.Konıashkın Májiliste kadrlyq áleýetti nyǵaıtý taqyrybynda ótip jatqan Úkimet saǵatynda.
Onyń paıymynsha, Qazaqstandaǵy eńbek naryǵyn qaıta qarastyrylýy múmkin, óıtkeni eńbekti basqarý jasandy ıntellekt kómegimen júzege asyrylady. Bul turǵyda mańyzdy faktor – qyzmetkerlerdi tsıfrlyq quraldardy basqarý jáne jasandy ıntellekt úlgilerin úırený úshin qaıta daıarlaý.
«Kadrlardy oqytýǵa keletin bolsaq, biz qazir «TechOrda» baǵdarlamasy aıasynda mamandardy daıarlaýdy belsendi túrde engizip jatyrmyz», - dedi R.Konıashkın.
Budan buryn habardlanǵandaı, QR Parlamenti Májilisi tóraǵasynyń orynbasary Danııa Espaevanyń aıtýynsha, tehnıkalyq jáne kásiptik bilim berýdi reformalaý arqyly jumysshy kásipterdiń bedelin arttyrý qajet. Sebebi qazirgi kezde kásiptik - tehnıkalyq bilimi bar mamandyqtarǵa degen suranys joǵary bilimdi túlekterge degen qajettilikten 70 paıyzǵa artyq.
