Eńbek naryǵy: qazan aıynda suranys pen usynys teńesip, áleýmettik sektor kósh bastady

ASTANA. KAZINFORM — Qazan aıynda Qazaqstannyń eńbek naryǵynda maýsymdyq báseńdeý baıqalǵanymen, qurylymdyq turaqtylyq saqtaldy. Enbek.kz derekteri bilim berý, qyzmet kórsetý jáne densaýlyq saqtaý salalarynyń jumys oryndary boıynsha kóshbasshy ekenin kórsetti. Bul týraly vedomstvonyń baspasóz qyzmeti málim etti.

 

— 2025 jylǵy qazan aıynda Enbek.kz elektrondyq eńbek bırjasynda jumys berýshiler tarapynan 132 myń bos jumys orny men 114,1 myń túıindeme jarııalandy. Qyrkúıek aıymen salystyrǵanda suranys 4,5%-ǵa (-6,2 myń), al usynys 12,6%-ǵa (-16,5 myń) tómendedi. Belsendiliktiń birshama tómendeýine qaramastan, eńbek naryǵy turaqtylyǵyn saqtap otyr, al suranys pen usynystyń araqatynasy teńgerimdi kúıde qalyp otyr, — delingen habarlamada.

Mınıstrliktiń dereginshe, bos jumys oryndarynyń sany boıynsha bilim berý salasy kósh bastap tur — 41,1 myń (31%), odan keıin ártúrli qyzmet kórsetý túrleri — 17,5 myń (13%) jáne densaýlyq saqtaý men halyqty áleýmettik qorǵaý salasy — 11,7 myń (9%). Bul salalar jıyntyq túrde barlyq bos oryndardyń shamamen jartysyn qurap, áleýmettik sektordyń jumyspen qamtýdy qamtamasyz etýdegi mańyzdy rólin aıqyndaıdy.

Qazan aıynda jumys berýshiler kóbine orta deńgeıli biliktilikke ıe mamandardy izdedi — 64,4 myń bos oryn. Budan sál az — joǵary bilikti (34,7 myń) jáne biliktiligi joq (32,9 myń) mamandarǵa arnalǵan oryndar boldy. Іzdenýshiler jaǵynan da osyndaı úrdis baıqaldy: orta biliktilik deńgeıindegi 47,7 myń, joǵary biliktiliktegi 40,6 myń jáne tómen biliktiliktegi 25,8 myń túıindeme ornalastyryldy. Bul eńbek naryǵyndaǵy suranys pen usynys qurylymynyń teńeskenin jáne biliktilik deńgeıleri boıynsha aıqyn teńsizdiktiń joq ekenin kórsetedi.

Qazan aıynda sondaı-aq suranys pen usynys deńgeıiniń óńirler boıynsha sáıkestigi baıqaldy: jumys berýshiler men jumys izdeýshilerdiń belsendiligi birkelki bólinip, bul eńbek naryǵynyń óńirlik qurylymynyń turaqtanǵanyn kórsetedi. Eń kóp bos jumys oryndary Túrkistan oblysynda (12 myń), Astana qalasynda (11,4 myń) jáne Jambyl oblysynda (8,8 myń) jarııalanǵan. Al túıindemeler sany boıynsha kóshbasshylar qatarynda Túrkistan oblysy (13,4 myń), Astana qalasy (9,1 myń) jáne Qyzylorda oblysy (8,3 myń) tur.

— Jas qurylymy turǵysynan barlyq túıindemelerdiń jartysyna jýyǵy (51,4 myń nemese 45%) 34 jasqa deıingi azamattar tarapynan ornalastyrylǵan. 35–44 jas aralyǵyndaǵy izdenýshiler 26% (29,2 myń), 45–54 jas aralyǵyndaǵy top 19% (21,8 myń), al 55 jastan asqandar 10% (11,7 myń) úlesti qurady. Áıelder dástúrli túrde belsendirek bolyp qala beredi — olardyń úlesine barlyq túıindemelerdiń 52%-y tıesili, — dep habarlady vedomstvodan.

Qazan aıynda eń kóp suranysqa ıe mamandyqtardyń qatarynda joǵary biliktilik talap etetin qyzmetter: tárbıeshiler (1,8 myń bos oryn), býhgalterler (1,1 myń) jáne matematıka muǵalimderi (1 myń) basym boldy. Orta deńgeıli mamandar arasynda qazandyq operatorlary (6,9 myń), egin ósirýshiler (2,2 myń) jáne medbıkeler (1,9 myń) erekshe suranysqa ıe boldy. Іzdenýshiler jaǵynan da uqsas qurylym baıqaldy: joǵary bilikti mamandar arasynda eń jıi ornalastyrylǵan túıindemeler býhgalter (2,2 myń), zańger (1,6 myń) jáne tárbıeshi (1,6 myń) mamandyqtaryna tıesili. Orta biliktilik deńgeıindegi mamandardyń ishinde qazandyq operatorlary (3,7 myń), medbıkeler (1,9 myń) jáne avtokólik júrgizýshileri (1,6 myń) boıynsha túıindemeler jıi kezdesti.

Jumys berýshiler usynǵan eń joǵary eńbekaqy deńgeıleri óndiris bastyǵynyń orynbasary (~1 mln teńge), kompıýterlik oıyndar dızaıneri (~990 myń teńge) jáne ombýdsmen (~990 myń teńge) laýazymdary boıynsha tirkeldi. Al eń joǵary eńbekaqy kútýleri kommertsııalyq áýe laıneriniń ushqyshy (~2,8 mln teńge), órttiń aldyn alý jáne sóndirý jónindegi kenshi (~2 mln teńge) jáne basqarma tóraǵasynyń orynbasary (~1,8 mln teńge) mamandyqtarynda baıqaldy. Usynylǵan jáne kútiletin eńbekaqy deńgeıleri arasyndaǵy alshaqtyq áli de saqtalady, ásirese basqarýshylyq jáne tehnıkalyq segmentterde.

Jalpy alǵanda, qazan aıynda eńbek naryǵy turaqtylyǵyn kórsetti: suranys pen usynys óńirler jáne biliktilik deńgeıleri boıynsha birkelki bólindi. Áleýmettik baǵyttaǵy salalar (bilim berý, densaýlyq saqtaý jáne qyzmet kórsetý) jumyspen qamtý qurylymynda negizgi rólin saqtap otyr. Kórsetkishterdiń shamaly aýytqýy eńbek naryǵynyń jazǵy maýsymnan keıin turaqtanǵanyn jáne suranys pen usynys arasyndaǵy tepe-teńdiktiń qalyptasqanyn bildiredi.

Buǵan deıin habarlanǵandaı, 25 myńnan astam múgedektigi bar adam jumyspen qamtyldy.