Qazaqstannyń Eńbek Eri Ilıa Jaqanov stýdenttermen birge bóget salýǵa qatysty
ATYRAÝ. KAZINFORM – Belgili kompozıtor, Qazaqstannyń Eńbek Eri Ilıa Jaqanov stýdenttermen birge bóget salýǵa qatysty.
Oblystyq jedel shtabtyń málimetinshe, Jaıyq ózeniniń jaǵalaýyndaǵy osal tustardy bekitýge kásiporyndar men mekemeler bekitilgen. Máselen, H.Dosmuhamedov atyndaǵy Atyraý ýnıversıtetiniń ustazdary men stýdentteri Almaly aýylynda bóget salýǵa kirisken.
Búgin, 9 sáýirde Qazaqstan jáne Qyrǵyzstan Respýblıkalarynyń eńbek sińirgen qaıratkeri, kompozıtor, Qazaqstannyń Eńbek Eri Ilıa Jaqanov Almaly aýylyna arnaıy bardy. Óner qaıratkeri ýnıversıtet oqytýshylarymen, stýdentterimen birge qapshyqqa topyraq toltyryp, bóget salý jumysyna úlesin qosty.
«Atyraý oblysynda tabıǵı sıpattaǵy tótenshe jaǵdaı jarııalanǵaly beri Jaıyq ózeniniń jaǵasyn bekitý qarqyn aldy. Tirshilik nári – Jaıyǵymyz arnasy aspasa eken, el qıyndyqqa tap bolmasyn dep tileımin. Qazir sý tasqyny Atyraý oblysyna ǵana emes, birneshe óńirge qaýip tóndirdi. Sol sebepten, bóget salyp jatqan jastardy qoldaýǵa keldim. Elimizdi qıyndyqtan birligimizben ǵana qorǵaı alamyz», -dedi Ilıa Jaqanov.
Óner qaıratkeriniń aıtýynsha, tabıǵı apat sıpatyndaǵy qıyndyqty jeńýge bolady.
«Bul úshin birinshiden, nıet túzý, taza bolýy kerek. Ekinshiden, nıetti qudiretti kúsh biriktirýi tıis. Úshinshiden, myqty tártip qajet. Tártip saqtalsa, eldiń birligi, tutastyǵy nyǵaıa túsedi. Prezıdent Qasym-Jomart Toqaev osyndaı kezde shydamdylyq pen uıymshyldyq eldi qıyndyqtan alyp shyǵatynyn aıtty. Birligimizben bar qıyndyqty eńseremiz», -dedi Ilıa Jaqanov.
H.Dosmuhamedov atyndaǵy Atyraý memlekettik ýnıversıtetiniń oqytýshy-professorlar quramy men stýdentteri úsh aýysymmen jumys isteıdi. Olar úsh kúnde 20 myńnan astam qapqa topyraq toltyrǵan.
Eske sala ketelik, budan buryn Atyraý oblysynda tótenshe jaǵdaı jarııalandy.
Atyraý oblysynyń ákimi Serik Shápkenov turǵyndar ómirine qaýip tónse, aldyn ala habarlanatynyn aıtty.
Keıin Jaıyq ózeniniń sýy Atyraý qalasyna qaı tustan kirýi múmkin ekenin habarlaǵan bolatynbyz.
Sondaı-aq, Atyraý turǵyndary tasqyn sýǵa qarsy bóget turǵyzýǵa judyryqtaı jumyldy.
