Qazaqstannyń eń qart turǵyny 116 jasynda dúnıeden ótti
ULYTAÝ. KAZINFORM — Qazaqstandaǵy eń qart turǵyn Túımegúl Temirbaeva 116 jasynda ómirden ozdy. Qaraly habardy Ulytaý oblysynyń ákimdigi jetkizdi. Osydan eki jyl buryn Kazinform tilshisine suhbat bergen ǵasyr jasaǵan áje uzaq ǵumyr keshýiniń syryn aıtyp, boıyndaǵy sergektik pen ómirge degen qushtarlyǵyn saqtaýǵa ne kómekteskenin bólisken edi.
Túımegúl Temirbaeva 1910 jylǵy 1 qańtarda Jambyl oblysynyń Baıqadam aýdanynda dúnıege kelgen. 22 jasynda Aıazbaı Temirbaevpen shańyraq kóterip, kóp uzamaı jubaıymen birge Jańaarqa aýdanyna qonys aýdarǵan. Sodan beri osy óńirde 90 jyldan astam ýaqyt ǵumyr keshti.
Erli-zaıypty tórt bala tárbıelep ósirdi. Túımegúl apa 15 nemere, 25 shóbere súıip, úlken áýlettiń ardaqty anasyna aınaldy. Jubaıy da uzaq ǵumyr keship, 96 jasynda ómirden ótken.
Osydan eki jyl buryn bergen suqbatynda keıýana basynan ótken kezeńderdi eske alyp, uzaq jasaýynyń ózindik syryn áńgimelegen edi.
Ǵasyrdan asqan ǵumyr ıesiniń aıtýynsha, uzaq jasaýynyń basty sebepteriniń biri — otbasynyń aıaly alaqany, kóńil tynyshtyǵy jáne ómir boıy eńbekten qol úzbeýi.
— Joldasym ekeýmiz uzaq ta baqytty ǵumyr keshtik. Tórt bala tárbıelep ósirdik. Qazir balalarymnyń, nemerelerim men shóberelerimniń ortasynda, solardyń qamqorlyǵyndamyn. Balalarym únemi qýanyshymdy eselep, maǵan qamqorlyq kórsetip keledi. Uzaq jasaýyma osynyń da septigi tıgen shyǵar, — degen edi Túımegúl apa.
Ol bala kúninen eńbekke etene aralasyp ósken. Ata-anasy jylqy ósirgendikten, kishkentaıynan úı sharýasyna kómektesip, bıe saýyp, qymyz ashytqan, jylqy kútimine aralasqan. Eseıgen shaǵynda da jubaıymen birge sharýashylyqtyń bar aýyrtpalyǵyn bólisip, qudyqtan sýdy ózi tasyp, qara jumystan qashpaǵan.
Keıýananyń júregine jylqyǵa degen yqylasy da erekshe jaqyn bolǵan. Ol jastaıynan atqa mingendi unatqanyn, jasy ulǵaıǵan shaqta da múmkindiginshe qımyl-qozǵalysyn shektemeýge tyrysqanyn aıtqan edi. Túımegúl apanyń paıymynsha, únemi qozǵalysta bolyp, eńbekten qol úzbeý onyń boıyndaǵy sergektikti saqtaýǵa sep bolǵan.
Ulytaý oblysynyń ákimdigi Túımegúl Temirbaevanyń dúnıeden ótýine baılanysty týǵan-týystary men jaqyndaryna kóńil aıtty.
— Ǵasyrdan astam ǵumyr keship, tutas bir dáýirdiń kýási bolǵan Qazaqstannyń eń qart turǵyny Túımegúl Temirbaevanyń dúnıeden ótýine baılanysty týǵan-týystaryna, jaqyndary men barsha otbasy múshelerine qaıǵyra kóńil aıtamyz. Uzaq ári ónegeli ǵumyrynda Túımegúl apa 15 nemere men 25 shóbere súıip, birneshe urpaqtyń ósip-jetilýine kýá boldy. Ol óz áýletiniń aqylshysy, tiregi ári berekesi edi. Túımegúl apa tek otbasynyń amandyǵyn oılap qana qoımaı, el ómirine de beıjaı qaramaǵan jan bolatyn. Memleket úshin mańyzdy oqıǵalardan tys qalmaı, qoǵamdaǵy ózgeristerdi jiti qadaǵalap, el bolashaǵyna árdaıym alańdap otyrdy. Ǵasyrdan astam ǵumyr keshken ananyń ónegeli ómir joly men jarqyn beınesi urpaqtarynyń jadynda ǵana emes, elimizdiń tarıhynda da saqtalatynyna senimdimiz, — delingen kóńil aıtýda.
Eske sala keteıik, bıyl 15 naýryzda Túımegúl apa referendýmǵa qatysyp, daýys bergen bolatyn.
