Qazaqstannyń elektr júıesin basqarýda jasandy ıntellekt qoldanyla bastady

«KEGOC» AQ Energetıka mınıstrliginiń energetıka salasyn tsıfrlyq transformatsııalaý jónindegi baǵyty aıasynda jasandy ıntellektini ákimshilik úderistermen qatar óndiristik qyzmetti basqarý júıesine kezeń-kezeńimen engizip jatyr.

Qazaqstannyń Ulttyq elektr jelisin basqaratyn kompanııa úshin jasandy ıntellekt kún saıynǵy tehnıkalyq, qarjylyq jáne basqarýshylyq aqparatty óńdeýdi jedeldetip, jumys tıimdiligin arttyrýdyń mańyzdy quralyna aınalyp keledi.

Jasandy ıntellektini engizýdiń basty maqsaty – qaıtalanatyn jumystardy avtomattandyrý, taldaý sapasyn jaqsartý jáne qyzmetkerlerdiń ýaqytyn basqarýshylyq sheshimder qabyldaýǵa baǵyttaý.

2026 jyl Qazaqstanda Tsıfrlandyrý jáne jasandy ıntellekt jyly bolyp jarııalanýyna baılanysty «KEGOC» barlyq bastamalaryn biryńǵaı baǵdarlamaǵa biriktirdi. Baǵdarlama aıasynda korporatıvtik servısterdi, óndiristik qyzmetti, elektrondyq qujat aınalymyn jáne uzaq merzimdi tsıfrlyq sheshimderdi qamtıtyn 35 joba iske asyrylyp jatyr.

Kompanııa búginde eńbekti qorǵaý jáne óndiristik qaýipsizdik (HSE), PR jáne syrtqy kommýnıkatsııalar, kadrlardy irikteý, ishki normatıvtik qujattar boıynsha birneshe jasandy ıntellekt agentin paıdalanady.

Bul tsıfrlyq kómekshiler korporatıvtik bilim bazasymen jumys istep, qajetti aqparatty izdeýge, taldaýǵa, qujattar men materıaldardy daıyndaýǵa, sondaı-aq kadrlyq jáne ákimshilik rásimderdi súıemeldeýge múmkindik beredi. Sonyń arqasynda buryn qolmen oryndalǵan kóptegen jumystar avtomattandyrylyp jatyr.

Jaqyn ýaqytta kompanııa qarjylyq taldaý júrgizetin jańa JI-agentti iske qosýdy josparlap otyr. Ol qarjylyq baqylaýdy, derekterdi taldaýdy jáne eseptilik daıyndaýdy jedeldetýge múmkindik beredi.

Óziniń JI-agentterimen qatar «KEGOC» AQ qoldanbaly mindetterdi sheshýge arnalǵan basqa da tsıfrlyq quraldardy paıdalanady. Olardyń qatarynda qazaq jáne aǵylshyn tilderine aýdarma servısteri, normatıvtik quqyqtyq aktiler boıynsha agent, satyp alý jónindegi assıstent, ISEZ boıynsha keńesshi, valıýtalyq operatsııalardy úılestirý agenti, tehnıkalyq erekshelikterdi taldaý quraly jáne elektrondyq qujat aınalymy júıesin jeti JI-agentti engizý arqyly tsıfrlyq transformatsııalaý jobasy bar. Munyń bári jasandy ıntellekt kúndelikti jumys protsesiniń ajyramas bóligine aınalyp kele jatqan biryńǵaı tsıfrlyq ortany qalyptastyrady.

«KEGOC» AQ úshin kelesi kezeń óndiristik taldaýǵa jasandy ıntellektini engizýmen baılanysty. 2026 jyly kompanııa ratsıonalızatorlyq usynystardy, elektr energııasy naryǵyn, shyǵyndar men aýytqýlardy taldaý, sondaı-aq jóndeý naýqanyn monıtorıngteý boıynsha sheshimderdi engizýdi josparlap otyr.

Infraqurylymdyq kompanııa úshin mundaı quraldardyń mańyzy erekshe. Olar derekterdi jyldam óńdeýge, aýytqýlardy dálirek anyqtaýǵa, jospar-fakt baqylaýyn kúsheıtýge jáne jumystardyń ýaqytynda oryndalmaý táýekelderin azaıtýǵa múmkindik beredi. Bul jaǵdaıda jasandy ıntellekt jaı ǵana tsıfrlyq servıs emes, ınjenerlik jáne basqarýshylyq sheshimderdi qoldaý quralyna aınalady.

— Búginde «KEGOC» AQ ishinde jasandy ıntellekt quraldary belsendi qoldanylyp keledi. Qazir olardy kompanııanyń shamamen 2 750 qyzmetkeri paıdalana alady. Eń kóp suranysqa ıe servıster — aýdarma quraldary. Sonymen qatar beıindi bólimsheler óz mindetterine beıimdelgen arnaıy JI-agentterin barǵan saıyn jıi qoldanady. Eger servıster iske qosylǵan alǵashqy kezeńde aı saıyn shamamen 1 417 suranys óńdelse, búginde bul kórsetkish 4,5 eseden astam ósip, 6 500-den asty, — delingen habarlamada.

Kompanııanyń málimetinshe, bul ósim jasandy ıntellektiniń endi tájirıbelik joba ǵana emes, kúndelikti jumystyń qalypty quralyna aınalyp kele jatqanyn kórsetedi. Tsıfrlyq kómekshiler qajetti aqparatty jyldam tabýǵa, qujattardy daıyndaý ýaqytyn qysqartýǵa jáne tıptik mindetterdi artyq qol eńbeginsiz oryndaýǵa múmkindik beredi.

Buǵan deıin KEGOC 2035 jylǵa deıin 7 myń shaqyrym jańa elektr jelisin salýdy josparlap otyrǵanyn jazǵanbyz.