Qazaqstannyń eksporttyq-kredıttik agenttigi halyqaralyq ESG reıtıngine endi
ASTANA.KAZINFORM – Agenttik halyqaralyq Sustainable Fitch agenttigi júrgizetin baǵalaý boıynsha ESG (ekologııa, áleýmettik jaýapkershilik jáne korporatıvtik basqarý) salasyndaǵy alǵashqy reıtıngte úshinshi deńgeıde baǵalady.
Bul kórsetkish Eksporttyq-kredıttik agenttigi AQ (EKA) turaqty damý strategııasyn ázirlep, ony óz qyzmetine sátti engizip jatqanyn, sondaı-aq qorshaǵan orta men áleýmettik jaýapkershilik baǵytyndaǵy saıasatty tıimdi júzege asyryp jatqanyn kórsetedi.
Aıta keteıik, 2023 jyly EKA parnıktik gaz shyǵyndylaryn azaıtýǵa baǵyttalǵan halyqaralyq uıym – Net Zero Export Credit Agencies Alliance (NZECA) qataryna endi. Alıans 2050 jylǵa qaraı klımatqa teris áserdi barynsha azaıtyp, nóldik deńgeıge jetkizýdi kózdeıdi. EKA bul uıymnyń múshesi retinde otandyq eksporttaýshylardyń tómen kómirtekti ekonomıkaǵa kóshýine jaǵdaı jasap, ekologııalyq taza jobalardy qoldaýǵa mindetteme aldy.
Sondaı-aq EKA – «Báıterek» ulttyq basqarýshy holdınginiń enshiles uıymy. Agenttik óńdeýshi sektordaǵy ónim eksportyn qoldaıdy. Basqarma tóraǵasy Allen Sháıjúnisovtiń aıtýynsha, agenttik jańa tehnologııalar men ekologııalyq óndiristerdi damytý arqyly el ekonomıkasyn ártaraptandyrýǵa úles qosyp otyr.
– Bul elimizdiń shıkizatqa táýeldiligin tómendetip, jańa jumys oryndaryn ashýǵa múmkindik beredi. Búginde EKA ESG talaptaryna saı keletin eksporttaýshylarǵa saqtandyrý boıynsha jeńildikter usynyp otyr. Bul – qazaqstandyq ónimniń qorshaǵan ortaǵa keri áserin azaıtyp, turaqty damý prıntsıpterin keńinen engizýge jol ashady. Al Sustainble Fitch bergen reıtıng bizdi jahandyq ekologııalyq jaýapkershilik jolynda jańa belesterge jeteleıdi, – dedi ol.
EKA saqtandyrý qorjynynyń basym bóligi shaǵyn jáne orta bıznes sýbektilerinen quralǵan. Bul ekonomıkalyq ósimdi qoldap, kásipkerlerge qarjy tartýǵa jol ashady.
Sustainable Fitch sarapshylary EKA-nyń korporatıvtik basqarý júıesin joǵary baǵalap, 2023 jyly engizilgen ESG-táýekelder saıasaty men saqtandyrý jeńildikterin erekshe atap ótti.
Buǵan deıin ekologııalyq talapty buzǵan munaı kompanııalaryna aıyppul salynǵanyn habarlaǵanbyz.
Sondaı-aq, BUU qory elimizdegi ekologııalyq jobalarǵa qomaqty qarajat bóletini jaıly jazǵanbyz.