Qazaqstannyń eksportqa 12 mıllıon tonna astyq shyǵarýǵa múmkindigi bar
ASTANA. KAZINFORM – Qazaqstannyń eksportqa 12 mıllıon tonna astyq shyǵarýǵa múmkindigi bar. Bul týraly Aýyl sharýashylyǵy qyzmetkerleriniń birinshi forýmynda Memleket basshysy Qasym-Jomart Toqaev aıtty.
«Bıyl Qazaqstannyń eksportqa 12 mıllıon tonna astyq shyǵarýǵa múmkindigi bar. Bul — óte kóp ónim jáne zor jaýapkershilik. Dıqandardyń ónimin syrtqy naryqqa shyǵarýǵa jan-jaqty qoldaý kórsetý — Úkimettiń basty mindeti. Eksporttyq áleýetimizdi arttyra túsý úshin álemdik naryqta suranysqa ıe baǵaly daqyldardy kóbirek ósirý qajet», — dedi Memleket basshysy.
Prezıdent sonymen birge ishki naryqqa ótkizýdiń utymdy joldaryn barynsha paıdalaný kerektigin basa aıtty.
«Almaty, Astana, Shymkent qalalarymen irgeles aımaqtardaǵy dıqandardyń mol múmkindigi bar. Osy oraıda Aqmola oblysyn úlgi retinde aıtýǵa bolady. Bul aımaq elordanyń „azyq-túlik beldeýi“ degen atqa laıyq ekenin dáleldedi. Bıyl oblystyń aýyl sharýashylyǵyndaǵy jalpy ónimi eki ese ósken. Bul — óte jaqsy nátıje. Sondyqtan aýqymdy ishki naryǵy bar qalalarmen shektesetin basqa da aımaqtar osy baǵytta belsendi jumys isteýi kerek. Qazaqstanda san túrli azyq-túlik ónimi shyǵarylady. Jurt óz ónimderimizdi kóbirek satyp alý úshin ony elge tanytyp, keńinen nasıhattaý kerek», — dedi Qasym-Jomart Toqaev
