Qazaqstannyń eksport kólemi 80 mlrd dollardan asty

ASTANA. KAZINFORM — Saýda jáne ıntegratsııa vıtse-mınıstri Áset Núsipov sońǵy jyldary elimizdiń eksporttaýshylaryna qandaı qoldaý kórsetilip jatqanyn aıtty. 

— Ótken jyly Qazaqstan eksportynyń kólemi 3,1%-ǵa ósip, 80 mıllıard dollardan asty. Onyń ishinde óńdeý ónerkásibi ónimderiniń eksporty 28,8 mıllıard dollarǵa jetti. Sonymen qatar, qyzmet kórsetý eksportynyń kólemi 10,8%-ǵa ósip, 11,8 mıllıard dollarǵa jetkenin atap ótpeýge bolmaıdy, — dedi ol Qazaqstan eksporttaýshylarynyń forýmynda.

Vıtse-mınıstr bul kórsetkish myńdaǵan kásipkerdiń eńbeginiń nátıjesi ekeni atap ótti.

— Eksporttyń basty qozǵaýshy kúshine aınalyp otyrǵan shaǵyn jáne orta bıznesti qoldaý — negizgi baǵyttardyń biri bolyp qala beredi. Ótken jyly ShOB-ty qoldaý jónindegi memlekettik baǵdarlama aıasynda 27 myńnan astam joba qarjylandyrylyp, jalpy somasy 1,6 trıllıon teńgeni qurady. ShOB sektorynyń el ІJÓ-sindegi úlesi 39,3%-ǵa jetip, ulttyq ekonomıkaǵa áseri artyp kele jatyr, — dedi Áset Núsipov.

Sondaı-aq ol mınıstrliktiń basty maqsaty — eksporttaýshylar úshin turaqty ári básekege qabiletti orta qalyptastyrý ekenin aıtty.

— Eksport degen jaı ǵana syrtqa taýar men ónim jetkizý emes, onyń arqasynda jańa óndiris oryndary ashylady, jumys oryndary qurylyp, salyq túsimderi artady. Sondyqtan Qazaqstan Úkimeti eksporttaýshylar úshin jaǵdaı jasaýdy, logıstıkalyq ınfraqurylymdy damytýdy jáne otandyq taýarlardy shetelge ilgeriletý tetikterin jetildirýdi júıeli túrde júrgizip keledi. Qoldaý sharalarynyń arqasynda, sondaı-aq barlyq memlekettik organdar men damý ınstıtýttarynyń kúsh-jigerimen bul jumysty artyrýǵa tyrysyp jatyrmyz, — dedi vıtse-mınıstr.

Aıta keteıik, buǵan deıin Qazaqstan Italııaǵa 100-den astam taýar túri boıynsha eksportty ulǵaıtýǵa qaýqarly ekenin jazǵan edik.