Qazaqstannyń eki óńirinde jylytý maýsymy áli bastalǵan joq
ASTANA. KAZINFORM — Búgin Energetıka mınıstrliginiń Memlekettik energetıkalyq qadaǵalaý jáne baqylaý komıtetinde jylytý maýsymynyń barysyna qatysty máseleler boıynsha Respýblıkalyq shtabtyń kezekti otyrysy ótti.
Otyrysqa óńirler ákimdikteriniń basshylyǵy, «KEGOC», «Samuryq-Energo», «TsAEK», «Qazaqstan temir joly» UK, «QazaqGaz Aimaq», «Qarajyra», «Shubarkól kómir», «Shubarkól Premıým» aktsıonerlik qoǵamdarynyń, «Qazaqstandyq kommýnaldyq júıeler» JShS-niń ókilderi, sondaı-aq elimizdiń energetıkalyq kásiporyndarynyń basshylary qatysty.
Komıtet tóraǵasy Ernar Hasenov jylytý maýsymyn ótkizý kezeńindegi negizgi mindetterdi atap ótip, energetıkalyq ınfraqurylymnyń turaqty jumysyn qamtamasyz etýdiń, tutynýshylardy turaqty jylýmen jabdyqtaýdyń jáne kómirmen ýaqtyly qamtamasyz etýdiń mańyzdylyǵyna toqtaldy.
Búgingi tańda elimizdiń 18 óńirinde jylytý maýsymy josparly rejımde bastaldy. Túrkistan oblysy men Shymkent qalasynda jylytý maýsymyn bastaý bekitilgen kestelerge sáıkes josparlanǵan.
— Kúzgi-qysqy kezeńge daıyndyq aıasynda elektr jáne jylý jelilerindegi josparlanǵan jóndeý jumystary aıaqtaldy. Atap aıtqanda, 17,1 myń km elektr berý jelisi, 444 qosalqy stantsııa jáne 3 408 taratý qurylǵysy men transformatorlyq qosalqy stantsııa jóndeldi. Sonymen qatar, jylý jelilerin jańǵyrtý boıynsha josparlanǵan kólem — 377 km boıynsha kúrdeli jóndeý tolyq aıaqtaldy. Jóndeý jumystarynyń eń aýqymdy kólemi Aqmola, Abaı, Shyǵys Qazaqstan jáne Qaraǵandy oblystarynda iske asyryldy, — deıdi mamandar.
Elektr stantsııalarynda jylytý maýsymynan ótýge qajetti jabdyqtar jumys isteýde, sondaı-aq jóndeý naýqany jalǵasýda. 2026 jyly 9 energııablok, 55 qazandyqty jáne 51 týrbınany kúrdeli jóndeý josparlanǵan. Búgingi kúni 8 energııablok, 47 qazandyq pen 31 týrbınanyń jóndeýi aıaqtaldy.
Kómirmen qamtamasyz etý máselesine de erekshe nazar aýdaryldy. Energetıkalyq kásiporyndardyń qoımalaryndaǵy kómir qory 5,7 mln tonnany, mazýt qory 130 myń tonnany quraıdy. Aldaǵy jylytý maýsymynda halyq pen kommýnaldyq-turmystyq sektordyń kómirge degen qajettiligi 7,3 mln tonna kóleminde baǵalanady. Jylytý maýsymynyń bastalýy kezeńine 3,5 mln tonna kómir daıyndaldy.
Keńes barysynda kómirdi úzdiksiz jetkizýdi baqylaýdy kúsheıtý, kómir tapshylyǵyna jáne baǵanyń negizsiz ósýine jol bermeý qajettigi atap ótildi.
Sondaı-aq otyrysqa qatysýshylar jekelegen energııa óndirýshi kásiporyndar men óńirlerdiń jumysyndaǵy problemalyq máselelerdi qarastyrdy. Árbir másele boıynsha naqty tapsyrmalar men olardy oryndaý merzimderi belgilendi.
Otyrys qorytyndysy boıynsha Ernar Hasenov energetıkalyq nysandardyń senimdi jumysyn qamtamasyz etýdi, tehnologııalyq buzýshylyqtardy jedel joıýdy jáne jylý jelilerinde temperatýralyq rejımniń saqtalýyn tapsyrdy. Budan bólek, kómir tuıyqtarynyń jumysyn kúndelikti baqylaýdy kúsheıtý mindetteldi.
Buǵan deıin jylytý maýsymy bastalǵaly Pavlodardyń turǵyn úı sektorynda 8 órt tirkelgenin jazǵan edik.
