Qazaqstannyń eki óner ýnıversıteti Túrki álemindegi halyqaralyq odaqqa múshe boldy

ASTANA. KAZINFORM — Qurmanǵazy atyndaǵy Qazaq ulttyq konservatorııasy men Kúlásh Baıseıitova atyndaǵy Qazaq ulttyq óner ýnıversıteti Túrki álemi óner ýnıversıtetteri odaǵynyń múshesi atandy. Tıisti sertıfıkattar Ankarada ótken halyqaralyq birlestiktiń VI otyrysynda tabystaldy. Bul týraly Mádenıet jáne aqparat mınıstrligi málim etti.

Qazaqstannyń eki óner ýnıversıteti Túrki álemindegi halyqaralyq odaqqa múshe boldy
Foto: Mádenıet jáne aqparat mınıstrligi

Túrkııanyń Ankara qalasynda Túrki álemi óner ýnıversıtetteri odaǵynyń VI otyrysy aıasynda halyqaralyq birlestikke jańa múshelerdi qabyldaý rásimi ótti.

Odaq quramyna Qurmanǵazy atyndaǵy Qazaq ulttyq konservatorııasy men Kúlásh Baıseıitova atyndaǵy Qazaq ulttyq óner ýnıversıteti qabyldandy.

Qazaqstannyń eki óner ýnıversıteti Túrki álemindegi halyqaralyq odaqqa múshe boldy
Foto: Mádenıet jáne aqparat mınıstrligi

Qazaqstandyq joǵary oqý oryndarynyń ókilderine Odaqqa múshelikti rastaıtyn sertıfıkattardy Halyqaralyq túrki mádenıeti uıymynyń (TÚRKSOI) Bas hatshysy Sultan Raev pen Odaq tóraǵasy, Ankara mýzyka jáne beıneleý óneri ýnıversıtetiniń rektory Gúlchın ıAhıa Kachar tabystady.

Yntymaqtastyq aıasynda túrki halyqtarynyń mádenı murasyn saqtap, dáripteýge, ulttyq oryndaýshylyq mektepterdi damytýǵa jáne óner salasyndaǵy joǵary oqý oryndary arasyndaǵy kásibı baılanysty nyǵaıtýǵa erekshe kóńil bólinedi.

Qazaqstandyq joǵary oqý oryndarynyń Odaqqa músheligi bilim men óner salasyndaǵy halyqaralyq yntymaqtastyqty damytýǵa, ulttyq mádenıetti álemge tanytýǵa yqpal etedi.