Qazaqstannyń eki gımnasty álem chempıonatynyń fınalyna shyqty
ASTANA. KAZINFORM — Qazaqstandyq eki gımnast — Narıman Qurbanov pen Nýrtan Idrısov Nıderlandta ótip jatqan álem chempıonatynyń fınalyna joldama aldy. Bul týraly UOK málim etti.
2024 jylǵy Olımpıada oıyndarynyń kúmis júldegeri Narıman Kýrbanov at snarıadyndaǵy jattyǵýda irikteý kezeńinen sátti ótti.
Otandasymyz tóreshilerdiń sheshimimen 14,866 upaı enshilep, ekinshi orynǵa ıe boldy. Odan joǵary nátıje kórsetken Armenııa ókili Gamlet Manýkıan 14,933 upaımen birinshi oryn aldy.
Al Nýrtan Idrısov jekeleı kópsaıystyń fınalyna shyqty. Ol alty snarıadtaǵy jattyǵýlardyń qorytyndysy boıynsha 79,665 upaı jınap, irikteý kezeńin 17-orynmen aıaqtady.
Degenmen Qazaqstan erler quramasy komandalyq fınalǵa óte almady. Ulttyq qurama 237,594 upaı jınap, irikteý kezeńinde 12-orynǵa turaqtady.
Erler arasyndaǵy jekeleı kópsaıystyń fınaly 22 qazanda ótedi. Al at snarıadyndaǵy jattyǵýlar boıynsha júldeler 24 qazanda sarapqa salynady.
