Qazaqstannyń egemendigi ózgermeıdi – Konstıtýtsııalyq reforma

ASTANA. KAZINFORM – Memlekettik keńesshi Erlan Qarın jańa Konstıtýtsııa jobasy boıynsha Prezıdent eldiń azattyǵyna qalaı kepil bolatynyn aıtty.

- 23-baptyń 6-tarmaǵynda Qazaqstan Respýblıkasynyń egemendigi men táýelsizdigine qol suǵýdy nasıhattaýǵa jol berilmeıtini bólek norma retinde aıqyndalǵan. 46-baptyń 17-tarmaǵynda Qazaqstan Respýblıkasy táýelsizdigi men aýmaqtyq tutastyǵyna tikeleı qater tónse, Prezıdenttiń tıisti sheshimder qabyldaýǵa quqyǵy bar ekeni aıtylǵan, - dedi Erlan Qarın.

Onyń aıtýynsha, jańa Konstıtýtsııanyń jobasynda egemendik sózi 6 ret kezdesedi.

- 2-baptyń 2-tarmaǵynda Qazaqstan Respýblıkasynyń egemendigi onyń búkil aýmaǵyn qamtıdy degen bultartpas norma bar. Osy baptyń 6-tarmaǵynda Qazaqstan Respýblıkasynyń egemendigi ózgermeıdi dep dál kórsetilgen. Al 4-baptyń 1- tarmaǵy mynandaı formada aıǵaqtalǵan: «Memlekettik bıliktiń birden-bir bastaýy jáne egemendik ıesi – Qazaqstan halqy». Egemendiktiń ıesi halyq ekeni Konstıtýtsııada tuńǵysh ret aıqyndalyp otyr. Qazir qoldanystaǵy Ata zańda mundaı uǵym, túsinik, formýlırovka joq, - dedi Memlekettik keńesshi.

Aıta ketý kerek, ótken apta aıaǵynda jarııalanǵan jańa Konstıtýtsııanyń jobasynda memlekettik tildiń mártebesi týraly norma 9-bapta ornalasqan. Ol jerde memlekettik til – qazaq tili ekeni, al memlekettik mekemeler men ózin-ózi basqarý uıymdarynda orys tili memlekettik tilmen qatar qoldanylatyny aıtylǵan.