Qazaqstannyń EAEO-ǵa tóraǵalyq etý kezeńindegi basymdyqtary belgili boldy
ASTANA. KAZINFORM – Shymkentte ótip jatqan QR Eýrazııalyq úkimetaralyq keńestiń keńeıtilgen quramdaǵy otyrysynda Premer-mınıstr Oljas Bektenov Eýrazııalyq ekonomıkalyq odaq ekonomıkalyq ózara is-qımyldy tereńdetýge baǵdarlanǵan halyqaralyq uıym bolyp sanalatynyn, ol negizgi Sharttyń birinshi babynda bekitilgenin atap ótti.
Bul týraly úkimettiń baspasóz qyzmeti habarlady.
Álemdegi qazirgi qalyptasyp otyrǵan kúrdeli geosaıası ahýalǵa qaramastan, Birlestik turaqty túrde óz maqsattary men mindetterin oryndap, EAEO memleketteriniń turaqty ekonomıkalyq ósimin qamtamasyz etýge baǵyttalǵan. Eń aldymen bul taýarlar, qyzmetter, kapıtal jáne eńbek kúshiniń erkin qozǵalysyn qamtamasyz etetin birtutas naryq qurýǵa qatysty. Sonymen qatar EAEO ulttyq ekonomıkalardy tehnologııalyq jańartýǵa, ónerkásiptik kooperatsııany damytýǵa jáne múshe memleketterdiń álemdik naryqtaǵy pozıtsııalaryn nyǵaıtýǵa yqpal etedi.
- 2026 jylǵy 1 qańtardan beri Qazaqstan Respýblıkasy Eýrazııalyq ekonomıkalyq odaq organdarynda tóraǵalyq etedi. Osyǵan baılanysty Memleket basshysy Qasym-Jomart Kemeluly Toqaev múshe memleketterdiń atyna Qazaqstan tóraǵalyǵynyń negizgi basymdyqtary kórsetilgen úndeý joldady. Eń aldymen, bizdiń nazarymyz EAEO-nyń qyzmeti salalarynda jasandy ıntellektini qoldanýǵa baǵyttalatyn bolady. Múshe memleketter úshin kedendik ákimshilendirý, logıstıka, ónerkásip, agroónerkásiptik keshen jáne basqa salalardaǵy jasandy ıntellektti qoldana otyryp, zamanaýı tehnologııalarǵa beıimdelý mańyzdy, — dep atap ótti Oljas Bektenov.
Sondaı-aq ol sózinde Qazaqstan óziniń aldyna tolyqqandy tsıfrlyq el bolý jóninde strategııalyq mindet qoıyp otyrǵanyna toqtaldy. Osy maqsatta Ortalyq Azııadaǵy eń iri halyqaralyq IT-startaptar tehnoparki sanalatyn Astana Hub kompanııasynyń negizinde zamanaýı ekojúıe qalyptastyrdy.
Bilim berýdi, ǵylymı zertteýlerdi jáne ınnovatsııalyq jobalardy qoldaý bastamasy biriktiretin Alem.ai halyqaralyq jasandy ıntellekt ortalyǵy ashyldy.
- Biz EAEO boıynsha áriptestermen tsıfrlyq retteý jáne ekonomıkany transformatsııalaý salasynda bilim men tájirıbe almasýǵa daıynbyz,-dedi Oljas Bektenov.
Osyǵan deıin Shymkentte Qazaqstan Eýrazııalyq úkimetaralyq keńestiń keńeıtilgen quramdaǵy otyrysy bastalǵany týraly jazdyq.