Qazaqstannyń e-Qyzmet júıesi halyqaralyq OPSI platformasynda tanystyryldy

ASTANA. KAZINFORM — Halyqaralyq OPSI platformasy Qazaqstannyń e-Qyzmet – personaldy basqarý yqpaldastyrylǵan aqparattyq júıesin engizý boıynsha saraptamalyq materıal jarııalady. Bul Qazaqstannyń memlekettik sektordaǵy kadrlyq protsesterdi tsıfrlandyrý jetistikteri halyqaralyq deńgeıde moıyndalyp jatqandyǵynyń kórsetkishi. Bul týraly Memlekettik qyzmet ister agenttigi málim etti. 

— e-Qyzmet júıesi — memlekettik basqarýdy tsıfrlyq jańǵyrtýdyń negizgi elementi jáne ulttyq kadr saıasatyn iske asyrýdyń mańyzdy quraly. Júıe HR-protsesterdi tolyq avtomattandyryp, kadrlyq derekterdi ortalyqtandyrady. Bıýrokratııalyq kedergilerdi joıyp, sýbektıvti sheshimder qabyldaý táýekelin barynsha azaıtady. Kadrlardy qabyldaý, tıimdilikti baǵalaý ári mansaptyq ilgeriletý úrdisteriniń merıtokratııalyq qaǵıdattarmen júzege asýyn qamtamasyz etedi, — delingen habarlamada.

Agenttiktiń dereginshe, platforma barlyq memlekettik organdardaǵy 400-den astam basqarýshylyq protsesterdi jáne HR-rásimderdi qamtıdy. e-Qyzmet irikteý rásimderin tsıfrlandyrý men ákimshilik kedergilerdi azaıtý esebinen kadrlyq júıeniń ashyqtyǵy men qoljetimdiligin arttyryp, kásibı jáne turaqty memlekettik qyzmetti qalyptastyrýǵa yqpal etken.

— e-Qyzmet júıesi týraly materıaldyń OPSI platformasynda jarııalanýy — Qazaqstannyń memlekettik qyzmetterdi tsıfrlandyrý jáne HR-áleýetin damytý salasyndaǵy halyqaralyq jetistigi. Bul Qazaqstan tájirıbesiniń tek el ishinde ǵana emes, jahandyq deńgeıde de qyzyǵýshylyq týdyryp otyrǵanynyń aıqyn dáleli. Mundaı qadam Memleket basshysynyń «Biz úırenetin ǵana emes, úıretetin ult bolýymyz kerek» degen ustanymyna sáıkes keledi, — dedi Memlekettik qyzmet isteri agenttiginiń Tóraǵasy Darhan Jazyqbaı.

e-Qyzmet júıesine 2022-2023 jyldary jańǵyrtý men tsıfrlyq irikteý tetikterin engizý arqyly bir bos orynǵa orta eseppen 5,5 úmitkerden kelip, kandıdattar arasyndaǵy básekelestik aıtarlyqtaı artyp otyr. Bul dástúrli júıemen salystyrǵanda úsh eseden joǵary kórsetkish.

Aıta ketý kerek, Qazaqstannyń tsıfrlandyrý salasyndaǵy jetistikteriniń halyqaralyq deńgeıde moıyndalýy elimizdiń Ekonomıkalyq yntymaqtastyq jáne damý uıymy (EYDU) bastamalaryndaǵy, álemdik saraptamalyq alańdardaǵy pozıtsııalaryn nyǵaıtýǵa múmkindik beredi.

OPSI (Observatory of Public Sector Innovation) — memlekettik basqarýdaǵy ınnovatsııalardy jınaýǵa, taldaýǵa jáne taratýǵa arnalǵan (EYDU)-nyń jahandyq platformasy. Onyń negizgi komponenti — Case Study Platform, onda álemniń túrli elderindegi reformalar, tsıfrlyq sheshimder jáne basqarýdyń jańa modelderi usynylady.

OPSI materıaldaryn úkimetter, halyqaralyq uıymdar, zertteý ortalyqtary men memlekettik basqarý salasynyń mamandary keńinen paıdalanady. Qazaqstandyq bastamalardyń platformada jarııalanýy eldiń ashyq, ınnovatsııalyq jáne memlekettik basqarýdyń sapasyn arttyrýǵa baǵyttalǵan memleket retindegi ımıdjin kúsheıtedi.

Buǵan deıin Memqyzmetshiler men depýtattar jarııalaýǵa mindetti kirister tizimi jańartyldy.