Qazaqstannyń DSU-daǵy músheligi: 11 jylda ne ózgerdi
ASTANA. KAZINFORM – Dúnıejúzilik saýda uıymyna múshe bolǵan 11 jyl ishinde Qazaqstan syrtqy saýda kólemin eki esege arttyrdy. Bul týraly QR Saýda jáne ıntegratsııa mınıstri Arman Shaqqalıev málim etti.
— DSU-ǵa múshe bolǵan 11 jyl ishinde taýar aınalymdy eki esege arttyrdyq. Búginde saýdamyzdyń 98%-y DSU-ǵa múshe eldermen júzege asyp jatqanyn atap ótken jón. Bul kólem jahandyq saýda arhıtektýrasynyń mańyzdy elementi bolyp qala beredi, – dedi A. Shaqqalıev Quryltaıda tilshiler suraǵyna jaýap bere otyryp.
Onyń aıtýynsha, Qazaqstannyń DSU-ǵa qosylýy eksporttyq múdde aıasynda naryqtarǵa shyǵýdyń aıqyn ári teń múmkindigin beretin erejeni qamtamasyz etti.
- Bul turǵyda Qytaı, Eýropa odaǵy jáne AQSh-ty atap ótsek bolady. Olardyń barlyǵy DSU-ǵa múshe elder sanatynda, – dedi mınıstr.
Aıta keteıik, búgin Quryltaıdyń jalpy otyrysynda «1994 jylǵy DSU-ny qurý týraly Marrakesh kelisimine Qazaqstannyń qosylýy týraly hattamaǵa qosymsha sanalatyn Kórsetiletin qyzmetter boıynsha Qazaqstannyń erekshe mindettemeleriniń tizbesine ózgeristerdi ratıfıkatsııalaý týraly» zań jobasy birinshi oqylymda maquldandy.
