Qazaqstannyń Dota 2 quramasy basty qarsylastaryn atady
ASTANA. KAZINFORM — Bolashaq oıyndary aıasynda ótip jatqan Dota 2 týrnırinde Qazaqstan atynan tek Rune Eaters komandasy qatysyp jatyr.
Komanda ókili Madı Ótegenovtiń aıtýynsha, qazaqstandyq ujym týrnırge irikteý kezeńinen sátti ótip, eldiń jalǵyz tolyq qazaqstandyq quramasy retinde qatysyp otyr.
— Biz Qazaqstannyń týyn halyqaralyq arenada qorǵap jatyrmyz. Eń kemi úzdik úshtikke enýdi maqsat etip otyrmyz. Týrnır joǵary deńgeıde uıymdastyrylǵan, barlyǵy kóńilimizden shyǵyp jatyr, — dedi ol.
Onyń sózinshe, jarysqa barlyǵy 16 komanda qatysady. Komandalar tórt topqa bólingen.
Madı Ótegenov negizgi qarsylastar retinde Qytaıdyń myqty toptaryn atady.
— Eń qaýipti qarsylastardyń biri — Xtreme Gaming. Jalpy Qytaıdyń Dota mektebi árdaıym óte myqty sanalady. Biz burynnan solarǵa qarap óstik. Qazir olarmen teń dárejede básekelesip, ózimizdiń de myqty ekenimizdi dáleldeýge tyrysamyz, — dedi komanda ókili.
Komandanyń aıtýynsha, Bolashaq oıyndaryna daıyndyqqa buǵan deıingi halyqaralyq jarystar tájirıbesi kómektesken. Qazaqstandyq oıynshylar jaqynda Esports World Cup týrnırine qatysyp, 5-8 oryn ıelengen.
Rune Eaters quramasy Qazaqstannyń birneshe óńirinen jınalǵan oıynshylardan quralǵan. Komanda sapynda Pavlodar, Shymkent, Almaty jáne Óskemen qalalarynyń ókilderi bar. Ár oıynshy kerrı, mıder, offleıner jáne eki sapport boıynsha óz óner kórsetedi.
Madı Ótegenovtiń aıtýynsha, mundaı deńgeıdegi Dota 2 jarystary Qazaqstanda sırek ótkiziledi.
— Bul — Qazaqstanda uıymdastyrylyp otyrǵan eń iri Dota 2 týrnırleriniń biri. Counter-Strike boıynsha mundaı jarystar jıi ótedi, al Dota 2 úshin bul erekshe oqıǵa. Sondyqtan Qazaqstannyń atynan jalǵyz quramanyń qatysyp otyrǵanyna qýanyshtymyz, — dedi ol.
Sonymen qatar Rune Eaters uıymynyń Dota 2 quramasynan bólek Counter-Strike jáne Mobile Legends baǵyttary boıynsha da jeke komandalary bar. Alaıda bul quramdar bir-birinen táýelsiz óner kórsetedi.
Komanda ókiliniń málimetinshe, oıynshylardyń jasy 20 men 27 jas aralyǵynda. Olar Bolashaq oıyndarynda Qazaqstannyń kıbersporttaǵy áleýetin kórsetip, halyqaralyq deńgeıde joǵary nátıje kórsetýge nıetti.
Aıta keteıik, buǵan deıin, bas tóreshi Phygital basketboldyń erejesin túsindirgen edi.
