Qazaqstannyń dıplomatııalyq ókildikteri qaza tapqan áskerı qyzmetshilerdi eske aldy
ASTANA. KAZINFORM — Mańǵystaý oblysynda qyzmettik mindetin atqarý kezinde qaza tapqan áskerı qyzmetshilerge baılanysty elde jalpyulttyq aza tutý kúni jarııalandy. Osy kúni Qazaqstannyń sheteldegi elshilikterinde eske alý sharalary ótti.
Kazinform agenttiginiń Belgııadaǵy menshikti tilshisiniń habarlaýynsha, jalpyulttyq aza tutý kúnine baılanysty Qazaqstannyń Brıýsseldegi elshiligine sheteldik dıplomattar men jergilikti BAQ ókilderi keldi.
Alǵashqylardyń biri bolyp NATO janyndaǵy Ázerbaıjannyń turaqty ókili kóńil aıtty. Ol kóńil aıtý kitabyna jazba qaldyrdy.
Belgııanyń Brussels Korner basylymynyń ókili Qadyr Dýran da kóńil aıtyp, qoldaý bildirdi. Ol qazaqstandyq áskerı qyzmetshilerdiń qazasyna qabyrǵasy qaıysyp, osy kúni Qazaqstan elshiligine kelýdi jón sanaǵanyn atap ótti.
Kazinform agenttiginiń Qytaıdaǵy menshikti tilshisi habarlaǵandaı, Beıjińdegi Qazaqstan elshiliginde qaza tapqan áskerı qyzmetshilerdi eske alý úshin Qazaqstannyń Memlekettik týy tómen túsirildi.
Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy.
Keıinnen Kaspııde qaza bolǵan áskerı qyzmetshilerdiń sany 12-ge jetip, ekeýi izdestirilip jatqany habarlandy.
Qorǵanys mınıstrligi oqý-jattyǵý kezinde qaza tapqan áskerı qyzmetshilerdiń tizimin jarııalady.
Áskerı qyzmetshilerdiń qaza bolý faktisi boıynsha qylmystyq is qozǵalyp, tergelip jatqanyn jazdyq.
Sonymen qatar, Prezıdent Qasym-Jomart Toqaev Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń týǵan-týystaryna kóńil aıtty.
Áskerılerdiń qazasynan keıin Aqtaýda úsh kúnge josparlanǵan merekelik sharalar ótpeıtini aıtyldy.
Búgin Kaspııde eki áskerı qyzmetshini izdeý operatsııasyna júzdegen adam jumyldyrylǵany habarlandy.
Sonymen qatar áskerı qyzmetshilerdiń qaýipsizdigine jaýapty tulǵalar kúdikke ilingeni týraly jazǵan edik.
Aıta ketelik Kaspııdegi tótenshe jaǵdaıdan keıin qutqarylǵan áskerı qyzmetshi esin jıǵan edi.
Búgin Kaspıı teńizinde joǵalǵan eki áskerı qyzmetshiniń denesi tabylyp, izdestirý operatsııasy aıaqtalǵan edi.
Sonymen qatyr Kaspııdegi áskerı qyzmetshilerdiń qazasyna baılanysty qylmystyq is eki bap boıynsha tergelip jatyr.
Qyzmetke salǵyrt qaraý jáne korabl júrgizý qaǵıdalaryn buzý boıynsha aýyr zardaptarǵa ákep soqqan qylmystyq quqyq buzýshylyqtar jasady degen kúdikpen QR Qarýly Kúshteriniń joǵary jáne aǵa komandalyq quramyndaǵy jaýapty laýazymdy tulǵalar ustalǵany belgili boldy.
