Qazaqstannyń depozıtterge kepildik berý qory jeke kompanııalarǵa senimgerlik basqarýǵa berildi

ASTANA. KAZINFORM — Ulttyq bank «Qazaqstannyń depozıtterge kepildik berý qory» AQ aktıvterin jeke basqarýshy kompanııalarǵa senimgerlik basqarýǵa berý úderisiniń bastalǵanyn habarlaıdy. Qarajatty berý UB baǵaly qaǵazdar naryǵyn damytý jáne enshiles uıymdardyń aktıvterin basqarýdan birtindep arylý strategııasy aıasynda júzege aspaq. 

Almaty qalasynda birneshe basqarýshy kompanııalardyń ókilderimen tıisti kelisimderge qol qoıý rásimi bolyp ótti.

Kelisimderge qol qoıý qorytyndysy boıynsha ótken baspasóz máslıhatynda QDKBQ Tóraǵasy Ádil Ótembaev jeke basqarýǵa beriletin aktıvterdiń saqtalýyn qamtamasyz etý boıynsha qoldanylyp jatqan sharalar týraly áńgimeledi.

«Biz tıisti táýekelderge baǵa berip, olardy saraptan ótkizip, jeke basqarýshy kompanııalar úshin ınvestıtsııalyq saıasatty ázirlep shyqtyq. Soǵan sáıkes Qordyń aktıvteri tek eń senimdi qarjy quraldaryna ınvestıtsııalanatyn bolady. Mysaly, Qazaqstan Respýblıkasynyń memlekettik baǵaly qaǵazdary, kvazımemlekettik sektordyń sýbektileri men halyqaralyq qarjy uıymdarynyń oblıgatsııalary. Olardyń óteý merzimi 3 jylǵa deıin. Sondaı-aq keri REPO operatsııalaryn aıtýǵa bolady. Endi osy baǵdarlama aktıvterdiń tabystylyǵyn arttyra túsedi degen úmittemiz. Qor úshin basty mindet — arnaıy rezervtiń qarajattaryn saqtaý jáne olardyń joǵary ótimdiligine qoldaý kórsetý», — dedi ol.

Qor Tóraǵasynyń aıtýynsha, jeke basqarýshylar aldynda belgilengen etalondyq portfeldiń (benchmarktyń) tabystylyq kórsetkishin arttyrý maqsaty qoıylǵan.

Táýekel týyndaǵan jaǵdaıda shartta QDKBQ úshin ony birjaqty retpen buzý múmkindigi qarastyrylǵan. Aktıvterdi jeke basqarýshylarǵa berý barysynda kastodıandar tarapynan qosymsha qadaǵalaýdy júrgizý arqasynda táýekelder barynsha azaıtylady.

Aıta ketelik, kastodıandar aktıvterdi esepke alýdy jáne saqtaýdy qamtamasyz etedi jáne jeke basqarýshylardyń ınvestıtsııalyq saıasattyń talaptaryn qanshalyqty oryndaıtyndaryna baqylaý júrgizip otyrady.

Óz kezeginde QUB Monetarlyq operatsııalar departamentiniń dırektory Nurjan Tursynhanov QUB bastamasy boıynsha Qazaqstan qor bırjasynyń alańynda QDKBQ aktıvterin ındekstik basqarý maqsatynda memlekettik baǵaly qaǵazdardyń ındeksi ázirlenip, iske qosylǵandyǵyn atap ótti.

«Biz QDKBQ jáne Qazaqstan qor bırjasymen birge úlken jumys atqardyq jáne búgin biz jańa tarıhı sáttiń qarsańynda turmyz dep nyq senimmen aıta alamyz. Elimizde tuńǵysh ret Qazaqstan qor bırjasynyń alańynda engizilgen jergilikti benchmark bazasynda QDKBQ syndy iri ınstıtýtsıonaldy ınvestordyń aktıvterine halyqaralyq tájirıbede keńinen paıdalanylatyn ındekstik tásil qoldanylatyn bolady. Aktıvterdi jeke basqarýǵa berý otandyq baǵaly qaǵazdar naryǵyna tyń serpin beredi dep senemiz. Sonymen qatar bul jeke basqarýshylarǵa beriletin aktıvterdiń kólemin arttyrý esebinen jeke basqarýshy kompanııalar naryǵynyń damýyna, sondaı-aq sol basqarýshylar arasynda básekelestikti kúsheıtý esebinen aktıvterdi basqarý tıimdiligin arttyrýǵa septigin tıgizedi», — dedi N. Tursynhanov.

Eske salamyz, qazirgi ýaqytta QDKBQ arnaıy rezervi aktıvteriniń mólsheri — 1,2 trln teńge. 

Alǵashqy kezeńde 200 mlrd teńge beriledi.

Ári qaraı aktıvterdi berý jeke basqarýshy kompanııalardyń tıimdilik kórsetkishterine qaraı kezeń-kezeńmen júzege asady.