Qazaqstannyń damýy búkil Ortalyq Azııanyń ilgerileýine yqpal etedi – ózbekstandyq sarapshylar
TAShKENT. KAZINFORM – Qazaqstannyń Ózbekstandaǵy elshiliginde Memleket basshysy Qasym-Jomart Toqaevtyń bıylǵy Joldaýyn talqylaýǵa arnalǵan keńes ótti, dep habarlaıdy Kazinform menshikti tilshisi.
Jıynǵa Ózbekstan Olıı Majlısiniń depýtattary, memlekettik organdardyń basshylary, dıplomattar, beldi sarapshylar men BAQ ókilderi qatysty. Olar Joldaýda kóterilgen bastamalarǵa pikir bildirip, óńirlik ıntegratsııa múmkindikterin talqylady.
Atap aıtqanda, keńeste sóz alǵan Ózbekstannyń Strategııalyq jáne óńiraralyq zertteýler ınstıtýty dırektorynyń birinshi orynbasary Akramjon Nematov Prezıdent Qasym-Jomart Toqaevtyń Qazaqstandy tolyq tsıfrlyq memleketke aınaldyrý usynysyna toqtaldy.
- Qasym-Jomart Toqaevtyń Qazaqstan halqyna Joldaýyn zor yqylaspen tyńdap shyǵyp, qujattyń óńirlik ıntegratsııaǵa baǵyttalǵan bólimderine erekshe nazar aýdardym. ıAǵnı, ol óz sózinde qazirgi halyqaralyq jaǵdaıdyń kúrt ózgerip jatqanyn atap ótti. Bul rette Ortalyq Azııa elderi ózara senimge negizdelgen seriktestikti jalǵastyra berýi tıis. Sonymen qatar, Qazaqstan ekonomıkalyq damýǵa serpin beretin jańa baǵytqa – tsıfrlyq transformatsııaǵa bet aldy. Kórshimizdiń ilgerileýi búkil Ortalyq Azııanyń alǵa jyljýyna sep bolary sózsiz. Onyń ústine bizdiń múddemiz ben maqsatymyz ortaq, - dep pikir bildirdi Akramjon Nematov.
Keńeste baıandama jasaǵan taǵy bir beldi ózbekstandyq saıasattanýshy Ravshan Nazarov Qazaqstan eldiń keshelek sulbasyn qalyptastyrýǵa kirisip ketkenin málim etti. Onyń aıtýynsha, tehnologııalyq damý bolmaı, strategııalyq mejelerge qol jetkizý múmkin emes.
- Qazaqstannyń tsıfrlyq tranformatsııaǵa bet buryp jatqany bizdi erekshe qýantady. Tıisinshe, balalardyń tsıfrlyq saýattylyǵyn arttyrý boıynsha Qasym-Jomart Toqaev kótergen bastama óz ýaqytynda jasalǵan usynys dep esepteımin. Qazirden qam jasaǵan memleket árqashan alda bolady. Bul óz kezeginde aımaqtyq yntymaqtastyqty nyǵaıtýǵa, tatý kórshilik qaǵıdasyna negizdelgen elderdiń yqpaldastyǵyn bekemdeı túsedi, - dep toqtaldy Ravshan Nazarov.
Jıynǵa qatysqan ózbekstandyq depýtattar da Ortalyq Azııadaǵy baılanystardy damytyp, Qazaqstanmen birlesken jobalardy júzege asyrýǵa qoldaý bildiretinderin atap ótti. Bul rette tek ortalyq apparat deńgeıinde emes, sondaı-aq aımaqtyq dárejedegi qarym-qatynastardy nyǵaıtyp, ózara ınvestıtsııa kólemin arttyrýǵa den qoıý mańyzdy.
Eske salaıyq, bıyl 8 qyrkúıekte Prezıdent Qasym-Jomart Toqaev Qazaqstan halqyna Joldaýyn jarııalǵan bolatyn. Onda Memleket basshysy eldiń keleshek damýyna qatysty josparyn usyndy. Atap aıtqanda, jasandy ıntellektini engizý, ózekti máselelerdi tsıfrlyq ózgerister arqyly sheshýge basymdyq berildi.