«Qazaqstannyń Damý Banki» AQ taǵam jáne sýsyn óndirisi sektoryna 500 mlrd teńge ınvestıtsııa salmaqshy

ASTANA. KAZINFORM – «Qazaqstannyń Damý Banki» AQ («Báıterek» holdınginiń enshiles qurylymy) Agroónerkásiptik keshende (AÓK), taǵam jáne sýsyn óndirisi sektorynda ınvestıtsııalyq jobalardy qoldaýdyń 2024-2029 jyldarǵa arnalǵan jańa baǵdarlamasyn iske qosty. Bul týraly banktiń baspasóz qyzmeti málim etti. 

«Baǵdarlama aıasynda qarjylandyrýdyń jalpy kólemi 500 mlrd teńgeni quraıdy. Baǵdarlamanyń negizgi maqsaty — ımportty almastyrý jáne eksportty keńeıtý maqsatynda aýyl sharýashylyǵy ónimderin qaıta óńdeýge baǵyttalǵan ınvestıtsııalyq jobalardy qoldaý. Osy baǵdarlama aıasynda eki ınvestıtsııalyq joba maquldandy — bul et óndiretin qus fabrıkasy jáne qaptalǵan tazartylǵan ósimdik maıyn óndirý úshin maı zaýytyn jańǵyrtý», — delingen habarlamada.

Baǵdarlama AÓK-tegi óńdelgen ónimniń úlesin 70%-ǵa deıin ulǵaıtý maqsaty qoıylǵan Memleket basshysynyń 2023 jylǵy 1 qyrkúıektegi Qazaqstan halqyna Joldaýyna sáıkes, sondaı-aq Úkimettiń ekonomıkalyq ósýdi qamtamasyz etý jónindegi josparyn iske asyrý aıasynda ázirlendi.

Sondaı-aq, QDB qaraýynda bıdaı, júgeri dánderin tereń óńdeý, et óndiretin qus fabrıkalaryn damytý, jylyjaı keshenin salý jáne kondıterlik fabrıkany keńeıtý, sondaı-aq eksporttyq agroónerkásiptik klasterdi qalyptastyrý boıynsha birqatar jobalar bar.

AÓK jáne taǵam ónerkásibi salasyndaǵy jobalardy qarjylandyrýdy usyný sharttary:

Qarjylandyrý somasy — 3 mlrd teńgeden bastap.

Qaryz merzimi — 5 jyldan 20 jylǵa deıin.

Budan basqa, AÓK jáne taǵam ónerkásibin qaıta óńdeý salasyndaǵy iri jobalardy iske asyrý maqsatynda QDB jobalardy Ekinshi deńgeıdegi banktermen, sondaı-aq sheteldik jáne halyqaralyq qarjy ınstıtýttarymen birlesip qarjylandyrýǵa múddeli.

Www.kdb.kz mekenjaıy boıynsha Banktiń resmı saıtynda nemese Klıenttermen jumys jasaý dırektsııasyna habarlasý arqyly baǵdarlamanyń sharttary týraly tolyq aqparat alýǵa jáne ótinim berýge bolady (baılanystar saıtta kórsetilgen).