Qazaqstannyń dáleldenbegen munaı qorynyń kólemi qansha
ASTANA. KAZINFORM – Munaıdy geologııalyq barlaý jumystarynyń tek 25 paıyzy ǵana oń nátıje beredi. Bul týraly Jibek Joly telearnasynyń «Ýáde» baǵdarlamasyna eksklıýzıvti suhbat bergen «QazMunaıGaz» UK» AQ basqarma tóraǵasy Ashat Hasenov aıtty.
- Dáleldengen munaı qoryn aıtar bolsaq, 4,4 mlrd tonna. Bul qatyp qalǵan tsıfr emes. Sebebi, oǵan geologııalyq barlaý jumystarynyń arqasynda anyqtalatyn munaı qorlary qosylyp otyrady. Munaıdyń qazirgi kólemin jylyna 100 mln tona óndiremiz dep bólip, 45 jylǵa ǵana jetedi deý qate uǵym. Tek ulttyq kompanııa ǵana emes, elimizdegi jer qoınaýyn paıdalanatyn 200-den astam munaı kompanııasy barlaý jumystaryn júrgizip jatyr, - dedi Ashat Hasenov.
Onyń atap ótýinshe, elimizdiń geologtary shógindi basseınder boıynsha aýqymdy jumys istedi. Nátıjesinde olar 15 shógindi basseındegi munaı qorynyń kólemin 76 mlrd tonnaǵa jetedi degen tujyrymǵa kelip otyr.
- Biraq, ony dáleldeý kerek. Dáleldeý úshin geologııalyq zertteý, barlaý jumystaryn júrgizý qajet. Iá, geologııalyq barlaý jumystary baıaý bolǵanymen júrgizilip jatyr. Máselen, biz kóptegen ýchaskede burǵylaý jumystaryn bastap kettik. Keńestik zamandaǵy josparly ekonomıka kezinde ken izdegende eń bastysy burǵylaý jumystary bolatyn. Al qazir kózqaras basqasha. Kapıtal turǵysynda shyǵyn óte úlken. Statıstıkaǵa qarasaq, geologııalyq barlaýy jumystarynyń 25 paıyzy ǵana oń nátıje beredi. ıAǵnı, 10 uńǵyma qazsa, onyń eki-úsheýi ǵana nátıjeli. Al oǵan qyrýar qarjy jumsalady, - dedi kompanııa basshysy.
Qashaǵan ken orny ashylǵaly 115 mln tonna munaı óndirilgenin jazǵan bolatynbyz.