Qazaqstannyń búkil aýmaǵynda aýa raıyna baılanysty eskertý jarııalandy
ASTANA. KAZINFORM - Qazaqstannyń barlyq óńirlerinde, sondaı-aq eldiń úsh megapolısinde 15 qańtarǵa kún raıyna baılanysty eskertý jarııalandy, dep habarlaıdy «Qazgıdromet» RMK-sy.
Sınoptıkterdiń boljamynsha, el aýmaǵynda aýa raıy kúrt qubylyp, qalyń qar, boran, kóktaıǵaq pen úskirik aıaz qatar júredi. Keı óńirlerde jeldiń ekpini sekýndyna 25–28 metrge deıin jetýi múmkin.
Batys Qazaqstan oblysynyń batysy men ońtústiginde qar jaýyp, boran soǵady, kóktaıǵaq bolady. Aımaqtyń birqatar bóliginde tuman túsedi. Oral qalasynda túngi jáne tańǵy ýaqytta tuman bolyp, jel kúsheıedi.
Qaraǵandy oblysynyń batysy, soltústigi men ońtústiginde jaıaý burqasyn soǵady. Oblystyń ońtústiginde jel ekpini keı sátte 23 m/s-qa deıin jetedi. Qaraǵandy qalasynda tańerteń jáne kúndiz boran bolady.
Pavlodar oblysynyń soltústigi men shyǵysynda 15–17 qańtar aralyǵynda túngi ýaqytta aýa temperatýrasy 40 gradýsqa deıin tómendep, qatty aıaz bolady. Osyndaı aıaz Shyǵys Qazaqstan oblysynyń soltústik jáne shyǵys bólikterinde de boljanyp otyr.
Ulytaý oblysynyń batysy men ońtústiginde qar jaýyp, boran soǵady. Jezqazǵan qalasynda da jel kúsheıedi. Abaı oblysynda tuman túsip, jeldiń ekpini 25 m/s-qa deıin jetýi yqtımal.
Qostanaı oblysynyń batysy men soltústiginde tuman túsedi.
Aqmola oblysynda jáne Kókshetaýda joldarda kóktaıǵaq bolady. Astanada da kóktaıǵaq jol qozǵalysyna qaýip tóndiredi.
Jambyl oblysynyń taýly aımaqtarynda qar men boran soǵyp, tuman men kóktaıǵaq bolady. Taraz qalasynda tuman bolýy múmkin. Túrkistan oblysynyń taýly óńirlerinde jaýyn-shashyn kúsheıip, qar aralas jańbyr jaýady, jel ekpini artady. Shymkent pen Túrkistan qalalarynda da jel kúsheıedi.
Almaty oblysynyń ońtústigi men taýly aımaqtarynda tuman túsedi. Almaty qalasynda 15 qańtarǵa qaraǵan túni jáne tańerteń tuman túsedi. Qonaev qalasynda da túngi jáne tańǵy ýaqytta tuman bolady.
Qyzylorda oblysynda túnde qar jaýyp, kúndiz jaýyn-shashyn (negizinen qar) bolady. Oblystyń birqatar bóliginde boran, kóktaıǵaq jáne tuman bolady.
Aqtóbe oblysynda jaıaý burqasyn soǵyp, jel kúsheıedi. Mańǵystaý oblysynda jańbyr men qar aralas jaýyn-shashyn túsip, kóktaıǵaq pen boran bolady. Atyraý oblysynda qar jaýyp, tuman, kóktaıǵaq bolady.
Sonymen qatar «Qazgıdromet» 16–17 qańtar kúnderi Túrkistan, Jambyl, Almaty jáne Jetisý oblystarynda aýa raıynyń kúrt ózgerýine baılanysty qalyń qar, boran, kóktaıǵaq jáne temperatýranyń aıtarlyqtaı tómendeıtnin eskertedi. Keı óńirlerde túnde aıaz 20–25 gradýsqa deıin jetýi múmkin.
Mamandar turǵyndardy alys jolǵa shyqpaýǵa, aýa raıy kúrt nasharlaǵan jaǵdaıda qaýipsizdik sharalaryn qatań saqtaýǵa shaqyrady. Qys minez kórsetip tur, al bul kúnderi saqtyq — eń basty talap.
Osyǵan deıin qar aralas jańbyrdan keıin Aqtaý kóshelerin sý basqany týraly jazdyq.
Al Atyraýda kóktaıǵaqqa baılanysty qozǵalys qıyndap, oqýshylar qashyqtan oqıdy.
