Qazaqstannyń bitimgerlerine qansha ótemaqy qarastyrylǵan
ASTANA. KAZINFORM – QR Qorǵanys mınıstriniń tárbıe jáne ıdeologııalyq jumystar jónindegi orynbasary Shaıh-Hasan Jazyqbaev qazaqstandyq bitimgerlerge qaı somada ótemaqy qarastyrylǵanyn aıtty.
Búgin Májilistiń jalpy otyrysynda depýtattar Taıaý Shyǵystaǵy sońǵy oqıǵalar aıasynda jáne Golan bıigindegi jaǵdaıǵa baılanysty Qazaqstan bitimgerleriniń qaýipsizdigi jóninde surady. Sonymen qatar elimizdiń áskerıleri jaralanǵan jaǵdaıda ótemaqy berý múmkindigi týraly suraq qoıyldy.
Óz kezeginde Shaıh-Hasan Jazyqbaev 2024 jyldyń aıaǵynda bolǵan shıelenis kezinde Qazaqstannyń bitimgerlik rotasy qaqtyǵysty toqtatýǵa qatysty is-sharalarǵa jumyldyrylmaǵanyn aıtty.
- Memorandým aıasynda tek bitimgerlik mıssııa boıynsha azamattyq personaldy Damask qalasyna evakýtsııamen aınalysty. Sondaı-aq basqa elderdiń bitimgerlerin bazaǵa kóshirýge qatysty. Ótemaqyǵa toqtalsaq, elimizdiń zańdarymen bekitilgen talap boıynsha árbir top múgedektigine 6-dan 30 aılyq tólemaqyǵa deıin belgilengen. Qaza tapqan jaǵdaıda 60 aılyq mólsherde tólenedi. Al BUU jaǵynan 77 myń AQSh dollaryna deıin tólemaqy bekitilgen, - dedi QR Qorǵanys mınıstriniń orynbasary.
Eske salsaq, byltyr jeltoqsan aıynda QR Qorǵanys mınıstrligi Golan jotalaryndaǵy bitimgerlerdiń qaýipsizdigi úshin qajet shara qabyldap jatqanyn habarlady.
2024 jyly naýryz aıynda qazaqstandyq bitimgerlerdi Golan bıigine shyǵaryp salý rásimi ótti.