Qazaqstannyń birneshe óńirinde jylytý maýsymy bastaldy
ASTANA. KAZINFORM - Shyǵys Qazaqstan, Pavlodar, Aqmola oblystary men Astana qalasynda jylý berý maýsymy bastalyp ta ketti. 1 qazannan bastap jylytý maýsymy Abaı, Aqtóbe jáne Qaraǵandy oblystarynda bastalady dep josparlanýda.
Qazaqstannyń Biryńǵaı elektr energetıkalyq júıesi Reseı Federatsııasynyń jáne Ortalyq Azııa elderiniń energetıkalyq júıelerimen qatarlas jumysyn jalǵastyra otyryp, qalypty rejımde jumys isteıdi.
«2024 jylǵa bekitilgen jóndeý kestesi aıasynda 10 energoblokta, 55 qazandyqta jáne 45 týrbınada kúrdeli jumystar josparlanǵan. Qazirgi tańda 4 energoblokta, 22 qazandyqta jáne 16 týrbınada jóndeý jumystary júrgizilse, 5 energobloktyń, 32 qazandyqtyń jáne 28 týrbınanyń jóndeý jumystary aıaqtaldy.
Barlyq elektr stantsııalary jylytý maýsymynyń bastalýyna daıyn, negizgi jabdyqtarmen, sonyń ishinde qazandyqtarmen jáne týrbınalarmen qamtamasyz etilgen. 2024 jyly AEK-tiń (elektr jelilerin taratý kompanııalarynyń) elektr jelilerinde 20,8 myń km elektr berý jelilerin, 422 qosalqy stantsııany jáne 4054 taratý pýnktteri men transformatorlyq qosalqy stantsııalardy jóndeý kózdelgen. Qazirdiń ózinde 19,9 myń km elektr jelileri, 376 qosalqy stantsııa jáne 4046 taratý pýnkti men transformatorlyq qosalqy stantsııalar jóndeldi», — dep jazdy Energetıka mınıstrliginen.
Jylýmen qamtý salasynda 2024 jyly 546 km jylý jelilerin kúrdeli jóndeý jáne jańǵyrtý josparlanǵan. Qazirgi ýaqytta 516,3 km jylý jelileri jóndeldi, bul jyldyq jospardyń 94,6% quraıdy.
Energııa kózderiniń qoımalaryndaǵy otyn qory 5,2 mln tonna kómir men 89 myń tonna mazýtty quraıdy, bul jylytý maýsymynyń turaqty ótýin qamtamasyz etýge múmkindik beredi.
QR Energetıka mınıstrliginiń Atomdyq jáne energetıkalyq qadaǵalaý jáne baqylaý komıteti energııa óndirýshi jáne energııa berýshi uıymdardyń, QR Ónerkásip jáne qurylys mınıstrliginiń, jergilikti atqarýshy organdardyń jáne «Qazaqstan Temir Joly» UK» AQ-nyń qatysýymen turaqty selektorlyq keńester ótkiziledi.
2024 jylǵy 11 qyrkúıekte kezekti keńes ótkizildi, onyń qorytyndysy boıynsha jóndeý jumystaryn ýaqytyly aıaqtaý, otynnyń normatıvtik qoryn saqtaý jáne energetıkalyq jabdyqtardy paıdalanýdy baqylaýdy kúsheıtý jóninde tapsyrmalar berildi.
Sonymen qatar aldaǵy jylytý maýsymyna daıyndyq barysy 2024 jylǵy 20 tamyzdaǵy Úkimet otyrysynda talqylandy. Barlyq problemalyq máseleler boıynsha tıisti sheshimder qabyldandy.
