Qazaqstannyń birneshe óńirinde ekinshi aýysym onlaın formatqa aýystyryldy

ASTANA. KAZINFORM — Qazaqstannyń birqatar aımaqtarynda qatty aıaz saldarynan mektepterdiń oqý kestesine ózgeris engizildi. Qaýipsizdik maqsatynda tústen keıingi aýysymdaǵy sabaqtar ýaqytsha qashyqtan oqytýǵa kóshirildi, dep habarlaıdy Kazinform agenttiginiń tilshisi. 

Pavlodar oblysynda aýa raıynyń qolaısyzdyǵyna baılanysty barlyq mekteptiń ekinshi aýysymdaǵy oqýshylary úıden oqýǵa jiberildi. Sol sııaqty Soltústik Qazaqstan oblysynda da mektepterdiń basym bóligi onlaın formatqa kóshti. Bul óńirde 73 461 oqýshynyń 72 433-i qazir qashyqtan bilim alyp jatyr. Tek ınternat tıpindegi mekemelerde ǵana sabaqtar oflaın formatta ótedi.

Aqtóbe oblysynda 1-11 synyp aralyǵyndaǵy barlyq oqýshy ýaqytsha onlaın oqýǵa aýystyryldy. Al Atyraý qalasynda 71 mektep qashyqtan oqytý rejımine kóshken. Bul rette balabaqshalar ádettegi tártipte jumysyn jalǵastyryp otyr.

Semeı qalasynda da qatty aıazǵa baılanysty ekinshi aýysymdaǵy 1-9 synyp oqýshylary onlaın formatta oqyp jatyr.

Qostanaı oblysynyń Qarabalyq aýdanynda aýa temperatýrasy -29 gradýsqa deıin tómendep, jel kúsheıgen soń ekinshi aýysymdaǵy barlyq mektep oqýshylary men kolledj stýdentteri qashyqtan oqýǵa jiberildi. Osyndaı sheshim Uzynkól aýdanynda da qabyldandy. Beıimbet Maılın aýdanynda -31 gradýs sýyqtyń saldarynan ekinshi aýysymdaǵy sabaqtar tolyqtaı toqtatylyp, oqýshylar úıden bilim alyp jatyr. Altynsarın aýdanynda da mektepter onlaın formatqa kóshti.

Lısakovsk qalasynda -27 gradýs aıaz kezinde ekinshi aýysymdaǵy 2-7 synyp oqýshylary qashyqtan oqyp jatyr. Fedorov aýdanynda 2-6 synyp oqýshylary onlaın formatqa aýyssa, Jangeldın aýdanynda 0-4 synyptaǵy ekinshi aýysym oqýshylary qashyqtan bilim alýǵa kóshirildi.

Óńirlik bilim basqarmalarynyń habarlaýynsha, barlyq sheshimder naqty aýa raıy jaǵdaıyna qaraı jedel qabyldanǵan. Aıaz báseńdegen soń mektepter qalypty oqytýǵa qaıta oralmaq.

Eske sala keteıik, ShQO TJD mamandary aıazǵa baılanysty azamattardy qaýipsizdik sharalaryn saqtaýǵa shaqyrdy.