Qazaqstannyń birqatar óńirinde qar jaýyp, joldarda kóktaıǵaq bolýy múmkin
ASTANA. KAZINFORM – Aldaǵy kúnderi Qazaqstannyń birqatar óńirinde aýa raıy turaqsyz bolyp, jańbyr aralas qar men qar jaýady. Kólik mınıstrligi júrgizýshilerdi jolǵa shyǵarda aýa raıy jaǵdaıyn eskerýge shaqyrdy.
Vedomstvo málimetinshe, óńirler arasyndaǵy aýa temperatýrasynyń aıtarlyqtaı aıyrmashylyǵyna baılanysty atmosferalyq fronttardyń ótýi elimizdiń soltústik jáne ortalyq óńirlerindegi aýa raıyna áser etedi.
Jańbyr aralas qar jáne qar jaýyp, aýa temperatýrasy tómendeıdi, jel kúsheıip, kóriný qashyqtyǵy nasharlaýy múmkin.
Qolaısyz aýa raıy respýblıkalyq mańyzy bar avtomobıl joldarymen qatar, jergilikti joldardaǵy jaǵdaıǵa da áser etýi yqtımal.
– Mundaı jaǵdaıda joldaǵy ahýal kún ishinde ózgerýi múmkin. Aýa temperatýrasy tómendegen kezde joldyń ylǵal jabyny taıǵaq bolýy yqtımal, al jaýyn-shashyn men tuman kóriný qashyqtyǵyn tómendetedi. Osyǵan baılanysty júrgizýshilerge qaýipsiz jyldamdyqty tańdap, araqashyqtyqty saqtap, kúrt manevrlerden aýlaq bolý mańyzdy, – delingen mınıstrlik habarlamasynda.
Kólik mınıstrligi árbir sapar aldynda aýa raıy boljamymen jáne baǵyt boıynsha joldardyń jaǵdaıymen aldyn ala tanysýǵa keńes beredi. Sondaı-aq sapar ýaqytyn aýa raıyn eskere otyryp josparlap, belgilengen jyldamdyq rejımi men qaýipsiz araqashyqtyqty saqtaý qajet.
Kópirlerde, jol ótkelderinde jáne ashyq ýchaskelerde erekshe saq bolǵan jón. Aýa raıy kúrt nasharlaǵan jaǵdaıda sapardy múmkindiginshe keıinge qaldyrý usynylady.
Respýblıkalyq mańyzy bar avtomobıl joldarynyń jaǵdaıy týraly aqparatty táýlik boıy jumys isteıtin «QazAvtoJol» baılanys ortalyǵynyń 1403 nómiri arqyly alýǵa bolady.
Aıta keteıik, bıylǵy jeti aıda 1403 baılanys ortalyǵy respýblıkalyq mańyzy bar avtomobıl joldaryna qatysty 850 myńnan astam ótinimdi qabyldap, óńdedi. Júrgizýshiler kóbine aqyly joldardaǵy tólem, joldardyń jaı-kúıi, buzylǵan kólikterdi evakýatsııalaý jáne basqa da máseleler boıynsha habarlasqan.
