Qazaqstannyń birqatar óńirinde boran men jelge baılanysty eskertý jarııalandy

ASTANA. KAZINFORM — «Qazgıdromet» RMK 25 qańtar kúni Qazaqstannyń birqatar óńirinde qolaısyz aýa raıy bolatynyn habarlady. Joldar kóktaıǵaq bolýy múmkin, keı jerde tuman túsip, jaıaý burqasyn soǵady.

Almaty qalasynda túnde tuman túsip, joldarda kóktaıǵaq bolady dep kútiledi.

Shymkent qalasynda túnde qar, kúndiz jańbyr men qar túsedi.

Aqmola oblysynyń ońtústik jáne shyǵys aımaqtarynda qar jaýyp, jaıaý burqasyn soǵyp, tuman basady.

Almaty oblysynyń soltústik, ońtústik jáne taýly aımaqtarynda keıde tuman bolady, joldarda kóktaıǵaq bolýy múmkin. Sondaı-aq jel ońtústik-shyǵystan soǵyp, shyǵysta jeldiń ekpini 15–20 m/s deıin kúsheıedi.

Atyraý oblysynyń batysy, soltústigi jáne ońtústiginde tuman túsedi.

Abaı oblysynyń ońtústiginde túnde jáne tańerteń tuman kútiledi. Jarma aýdanynda kúndiz jeldiń jyldamdyǵy 15–20 m/s jetedi.

Jambyl oblysynyń soltústik, ońtústik jáne taýly aımaqtarynda túnde qar, jaıaý burqasyn, kóktaıǵaq bolady. Al kúndiz batys jáne ońtústik aımaqtarda kóktaıǵaq, taýly aımaqtarda qar men jaıaý burqasyn, keıde tuman túsýi yqtımal. Jel ońtústik-batystan soǵyp, keı jerde 15–20 m/s, keıde 23–28 m/s deıin kúsheıedi.

Jetisý oblysynyń taýly aımaqtarynda keıde tuman túsedi, joldarda kóktaıǵaq bolady. Alakól kólderi aýdanynda jel 15–20 m/s, keıde 23–28 m/s deıin jetýi múmkin.

Qaraǵandy oblysynyń batysy, soltústigi, ońtústiginde túnde qar, jaıaý burqasyn, kúndiz ońtústik jáne shyǵys aımaqtarda qar, jaıaý burqasyn, batys, soltústik jáne shyǵys aımaqtarda tuman kútiledi.

Qostanaı oblysynyń batysy, soltústigi jáne ońtústigin tuman basady.

Qyzylorda oblysynyń ońtústiginde túnde kóktaıǵaq bolyp, oblystyń ortalyǵy, soltústik jáne ońtústiginde tuman túsedi.

Mańǵystaý oblysynyń batysy, soltústigi jáne ortalyǵynda tuman túsip, kóktaıǵaq bolady.

Túrkistan oblysynda túnde qar, jaıaý burqasyn, kóktaıǵaq bolady. Taýly aımaqtarda qalyń qar, kúndiz jańbyr aralas qar, kóktaıǵaq, jaıaý burqasyn kútiledi. Batys, soltústik, ońtústik jáne taýly aımaqtarda tuman bolady. Jel soltústik-shyǵystan soǵyp, keıin ońtústik-shyǵysqa aýysyp, jyldamdyǵy 15–20 m/s jetedi, keı jerlerde 25 m/s deıin kúsheıedi.

Ulytaý oblysynda túnde qar, jaıaý burqasyn, kúndiz ońtústik, shyǵys jáne ortalyq aımaqtarda qar, jaıaý burqasyn bolady. Óńirdiń ońtústik, shyǵys jáne ortalyq aımaqtarda tuman túsedi.

Budan buryn respýblıkalyq mańyzy bar birqatar avtojolda keshke aýa raıynyń nasharlaýyna baılanysty qozǵalys shektelgeni habarlandy.