Qazaqstannyń BRIKS elderimen saýdasy $72 mlrd-qa jýyqtady
NЬıÝ-DELI. KAZINFORM — Qasym-Jomart Toqaev byltyr Qazaqstannyń BRIKS-qa múshe jáne seriktes eldermen taýar aınalymy 72 mıllıard dollarǵa jýyqtaǵanyn aıtty, dep habarlaıdy Aqordanyń baspasóz qyzmeti.
— Biz barlyq BRIKS memleketterimen saýda-ekonomıkalyq jáne ınvestıtsııalyq baılanystardy ártaraptandyrýǵa nıettimiz. Oǵan ónerkásip, tranzıt jáne tehnologııalyq áleýetimiz jetedi. Qazaqstan Eýrazııalyq ekonomıkalyq odaqtyń qazirgi tóraǵasy retinde BRIKS-pen ekonomıkalyq yntymaqtastyqty keńeıtýdi jáne Úndistanmen erkin saýda týraly kelisim jasasýdy quptaıdy. Elimiz negizgi shıkizat kózderin jetkizetin senimdi seriktes retinde dúnıe júzindegi tasymal tizbeginiń qaýipsizdigin qamtamasyz etýge úles qosyp keledi. Bizdiń oıymyzsha, energetıka, asa mańyzdy mıneraldar jáne aýyl sharýashylyǵy salalarynda ónimdi tereń óńdeý boıynsha seriktestikti damytýǵa múmkindik mol. Bul rette tehnologııa men bilim almasýǵa jáne birlesken ınvestıtsııaǵa aıryqsha mán bergen jón. Budan bólek, bizdiń aýqymdy ınfraqurylym jobalardy, sonyń ishinde halyqaralyq mańyzy bar bastamalardy birleske iske asyrýǵa áleýetimiz jetedi. Jańa damý banki BRIKS elderindegi, sondaı-aq Qazaqstandaǵy kommertsııalyq turǵydan ómirsheń jobalardy qarjylandyrý múmkindigin qarastyra alar edi, — dedi Memleket basshysy.
Qazaqstan Prezıdenti kólik qatynasyn nyǵaıtý múmkindikterge jol ashyp, ortaq ekonomıkalyq ósimge tyń serpin beredi dep sanaıdy.
— Qazaqstan Eýrazııadaǵy basty tranzıt-logıstıka ortalyqtarynyń biri retinde temirjol jelilerin, porttar men tsıfrlyq ınfraqurylymdy damytý arqyly transshekaralyq júk tasymalyn anaǵurlym tez ári boljamdy qalypqa túsirgisi keledi. Ótken jyly Qazaqstan arqyly 40 mıllıon tonnaǵa jýyq tranzıttik júk tasymaldandy. Uzaqmerzimdi jospar boıynsha osy kórsetkishti jylyna 100 mıllıon tonnaǵa jetkizýdi maqsat etip otyrmyz. Qazir Qytaı men Eýropa arasyndaǵy qurlyq joldarymen jetkiziletin júktiń 85 paıyzy Qazaqstan aýmaǵymen ótedi. Elimiz Transkaspıı halyqaralyq kólik baǵyty aıasynda Azııa men Eýropa arasyn Kaspıı teńizi arqyly jalǵaıtyn strategııalyq núkte sanalady. Bul mańyzdy baǵdardy «Bir beldeý, bir jol» bastamasymen jáne «Soltústik — Ońtústik» halyqaralyq kólik dálizimen ushtastyrý Eýrazııanyń barynsha ıntegratsııalanǵan jáne ornyqty kólik jelisin qalyptastyrýǵa múmkindik beredi. Osy oraıda, Úndistan logıstıka jáne jetkizý tizbegi salalaryndaǵy yntymaqtastyqty kózdeıtin BRIKS Negizdemelik baǵdarlamasyn usyndy. Men muny quptaımyn. Óıtkeni ol BRIKS plıýs formatyndaǵy naqty yntymaqtastyqty nyǵaıtýǵa yqpal etedi, — dedi Qasym-Jomart Toqaev.
Buǵan deıin Toqaev transshekaralyq ınfraqurylymǵa tóngen qaýip týraly aıtty.
